Azərbaycan Qida Təhlükəsizliyi İnstitutu qida təhlükəsizliyinin təmin edilməsi üzrə qiymətləndirmə və dəstək xidməti təklif edir
11 Yanvar 2023 15:43
Azərbaycan Qida Təhlükəsizliyi İnstitutu (AQTİ) qida sahəsində fəaliyyət göstərən sahibkarlıq subyektlərinə anbarlarda qida təhlükəsizliyinin təmin edilməsi üzrə qiymətləndirmə və dəstək xidməti təklif edir.
Qiymətləndirmə və dəstək xidməti sahibkarlara qida məhsullarının saxlanması zamanı qüvvədə olan qanunvericiliyin və texniki normativ hüquqi aktların tələblərinə müvafiq dəstəyi əhatə edir.
Xidmət mal qəbulu prosesinin, nəzarət sisteminin, eləcə də qəbul, yerləşdirilmə, saxlanma zamanı təhlükəsizlik və gigiyena qaydalarının tətbiqi, malların növünə görə yerləşdirilməsi üzrə təlimatın və malların saxlanması müddətinin izləmə prosedurlarının hazırlanması, anbarlarda təmizlik işlərinin və inventarlaşdırmanın təşkili, barkod üzərində məhsulun izləmə sisteminin təmin edilməsi mərhələləri üzrə təşkil olunur. Həmçinin işçi heyətin təlimatlandırılması və məhsul saxlama obyektinin qida təhlükəsizliyi üzrə mövcud normativ texniki hüquqi aktların tələblərinə uyğun olaraq qiymətləndirilməsinin həyata keçirilməsi də bu mərhələlərə daxildir.
Peşəkar mütəxəssislər tərəfindən təklif olunan xidmət müəssisəyə qida təhlükəsizliyi baxımından təhlükələrin yaranma ehtimalının minimuma endirilməsini, yararsız məhsulun anbara daxilolma ehtimalının azadılmasını, saxlama zamanı mal qonşuluğu prinsiplərinin pozulmasına yol verilməməsini, yararlılıq müddəti bitmiş qida məhsullarının anbarda qalma ehtimalının olmamasını həyata keçirməyə imkan verir. Eyni zamanda doğru məlumat əldə etməyin təmin olunmasını, istehlakçı məlumatsızlığının aradan qaldırılmasını, bənzər mallar və ya bənzər kodlara sahib mallar arasındakı qarışıqlığa yol verilməməsini, sürətli məlumat mübadiləsi və məhsul izlənilməsinin təmin edilməsini reallaşdırmağa şərait yaradır.
Qida sahəsində fəaliyyət göstərən sahibkarlıq subyektləri qida təhlükəsizliyinin təmin edilməsi üzrə qiymətləndirmə və dəstək xidmətindən istifadə etmək üçün (012) 377 00 20 (daxili 016 və 594) nömrəsilə əlaqə saxlaya bilərlər.
Qeyd edək ki, AQTİ qida sahəsində fəaliyyət göstərən sahibkarlıq subyektlərinə qida təhlükəsizliyinə dair elmi, texniki və praktiki dəstək, həmçinin qida təhlükəsizliyi göstəriciləri üzrə tədqiqat xidmətləri təklif edir.
Oxşar xəbərlər

Saxta süd məhsullarının sosial media səhifəsində satışa çıxarıldığı müəyyən edilib
Sosial media platformasında satışı həyata keçirilən qaymağın keyfiyyətinin aşağı olması ilə bağlı Qida Təhlükəsizliyi Agentliyinə daxil olan müraciət əsasında Abşeron rayonu, Masazır qəsəbəsi, Ə.Vahid küçəsi, “Salty Park” yaşayış kompleksi, giriş 1, ev 295 ünvanında yoxlama keçirilib. Baxış zamanı fiziki şəxs Nəzərova Könül Sabir qızının istehsalçı müəssisələrdən tərkibində quru süd və süd yağı əvəzedicisi olan müxtəlif növ süd məhsullarını (qaymaq, pendir və s.) alıb etiketini çıxararaq, “təbii süd məhsulu” adı altında, müşayiətedici sənədləri olmadan “TikTok” və “İnstagram” sosial media səhifələrində satışını həyata keçirdiyi aşkarlanıb. Eyni zamanda süd məhsullarının temperatur rejimi gözlənilmədən, soyuducu avadanlıqla təmin edilməyən minik avtomobili vasitəsilə müştərilərə çatdırıldığı müəyyən edilib. Faktla bağlı qanunvericiliyə uyğun zəruri tədbirlər görülüb, qanunsuz fəaliyyətin qarşısı alınıb. Qeyd edək ki, saxta məhsulların satışı istehlakçıların hüquqlarının pozulmasıdır. Saxlama şəraitinə riayət olunmadan məhsulların satışı isə mikrobioloji çirklənməyə səbəb ola bilər ki, bu da insan sağlamlığı üçün təhlükəli hesab olunur. Vətəndaşlar qida təhlükəsizliyi sahəsində istehlakçı hüquqlarının pozulması və qanunazidd hallarla rastlaşdıqda, bu barədə konkret faktlarla Agentliyin “1003-Çağrı Mərkəzi”nə məlumat verə bilərlər. Müraciət daxil olduqdan dərhal sonra araşdırmalara başlanılacaq və qanunvericiliyə uyğun müvafiq tədbirlər görüləcəkdir.

Bərdədə heyvan satışı bazarında ciddi nöqsanlar müəyyən edilib
Bərdə rayonu, Alpoud kəndində fəaliyyət göstərən “Ticarət Mərkəzi” MMC-yə məxsus heyvan satışı bazarında Qida Təhlükəsizliyi Agentliyinin əməkdaşları tərəfindən keçirilmiş yoxlama zamanı aşkarlanan nöqsanların icra vəziyyəti ilə bağlı plandankənar yoxlama aparılıb. Baxış zamanı bazarda satışa çıxarılan müxtəlif çeşiddə ət məhsullarının və unlu qənnadı məmulatlarının temperatur rejiminə əməl edilmədən və birbaşa günəş şüaları altında saxlandığı, əl yuma çanaqlarının mövcud olmadığı, qida məhsulları ilə təmasda olan səthlərin korroziyaya uğradığı və natəmiz olduğu, qida məhsulları üçün ayrıca yuma sahəsinin təşkil edilmədiyi, işçi heyətin gigiyena qaydalarına riayət etmədiyi və xüsusi geyimlə təmin olunmadığı, müvafiq təmizlik işlərinin görülmədiyi aşkarlanıb. Faktla bağlı sahibkar barəsində inzibati protokol tərtib olunub, qeyd edilən məhsullar satışdan kənarlaşdırılıb və icrası məcburi göstərişlər verilib.

Sabirabadda fəaliyyət göstərən kafedə nöqsanlar aşkarlanıb
Sabirabad rayonu, Qaragüney kəndində fəaliyyət göstərən Bayramov İlqar Musa oğluna məxsus ”Dərələyəz” kafesində Qida Təhlükəsizliyi Agentliyinin əməkdaşları yoxlama keçirib. Baxış zamanı kafedə sanitar-texniki və sanitar-gigiyenik tələblərin pozulduğu, qida məhsullarının saxlanması zamanı temperatur rejiminə əməl olunmadığı, müvafiq təmizlik işlərinin görülmədiyi, işçinin tibbi müayinədən keçmədiyi və digər nöqsanlar aşkarlanıb. Faktla bağlı kafenin fəaliyyəti nöqsanlar aradan qaldırılanadək məhdudlaşdırılıb, rəhbəri inzibati məsuliyyətə cəlb olunub.