Giriş
Çərəzlərin faydası və düzgün istehlak qaydası - VİDEO
17 Mart 2026 15:50
Bayram süfrəsinin bəzəyi olan qoz, badam, fındıq və digər çərəzlər orqanizm üçün vacib olan vitamin, mineral və antioksidantlarla zəngindir. Zəngin tərkib sayəsində çərəzlər immuniteti möhkəmləndirir, həzm sisteminin fəaliyyətini dəstəkləyir, zehni aktivliyi artırır və qaraciyərin normal funksiyasına müsbət təsir göstərir. Gün ərzində bir ovuc çərəz yemək bədəni ehtiyac duyduğu bir çox faydalı maddələrlə təmin edir.
Qida Təhlükəsizliyi Agentliyi bayram günlərində çərəz istehlakının artdığını nəzərə alaraq vətəndaşlara müraciət edib. Bildirilib ki, həddindən artıq istehlak artıq çəki, piylənmə, həzm pozğunluğu və allergik reaksiyalara səbəb ola bilər. Buna görə də ölçüyə diqqət etmək, gündəlik normanı aşmamaq vacibdir.
Çərəzlərin faydasını maksimum qorumaq üçün onları qovrulmamış və ya az miqdarda, yüngül qovrulmuş halda istehlak etmək daha məqsədəuyğundur. Çünki yüksək temperatur onların vitamin və minerallarını azaldır.
Çərəz alarkən görünüşünə, rənginə, formasına və qoxusuna diqqət edilməlidir. Qablaşdırılmış məhsulun isə mütləq istehsal və son istifadə tarixi yoxlanılmalıdır. Düzgün şəraitdə saxlanılmayan çərəzlərdə zərərli maddələr – aflatoksinlər yarana bilər. Kif bəzən pambıqvari və ya rəngli ləkələr şəklində görünsə də, məhsulun dərin qatlarına qədər yayılır. Bu səbəbdən kifli hissəni kəsib istifadə etmək təhlükəlidir.
İstehlak etməzdən əvvəl çərəzləri yumaq tövsiyə olunur. Açıq şəkildə satılan məhsulların toz və yad maddələrlə çirklənməsi mümkündür. Onları sərin, quru və qaranlıq mühitdə saxlamaq dadı və faydalı xüsusiyyətlərini qorumağa kömək edir.
Daha ətraflı link:
Oxşar xəbərlər
Həkim-nutrisioloq: BAQM-ların və idman qidalarının nəzarətsiz istifadəsi ciddi fəsadlara səbəb ola bilər
İdman qidaları və bioloji aktiv qida məhsulları balanslı qidalanmanı əvəz etmir. Bu məhsullar yalnız düzgün və balanslaşdırılmış qidalanma rejimi qurulduqdan sonra əlavə dəstək kimi istifadə oluna bilər. Bu barədə həkim-nutrisioloq Emil Hidayətli bildirib. Onun sözlərinə görə, bu cür əlavələrin qəbulundan əvvəl mütləq həkim və ya sahə üzrə ixtisaslaşmış mütəxəssislə məsləhətləşmək vacibdir. Orqanizmin sağlamlıq vəziyyəti, xüsusilə böyrək və qaraciyərin funksional durumu nəzərə alınmadan qəbul edilən əlavələr sağlamlıq üçün risk yarada bilər. Emil Hidayətli qeyd edib ki, bioloji aktiv qida məhsulları və idman qidalarının normadan artıq və ya nəzarətsiz istifadəsi ciddi fəsadlara səbəb ola bilər. Bu səbəbdən, onların dozası və istifadəsi fərdi xüsusiyyətlərə uyğun şəkildə müəyyən edilməlidir. “Bu məhsullar yalnız ixtisaslaşmış satış məntəqələrindən və mütəxəssis tövsiyəsi təqdim edə bilən etibarlı müəssisələrdən əldə olunmalıdır. Kortəbii şəkildə, qeyri-rəsmi mənbələrdən və ya başqalarının təcrübəsinə əsaslanaraq bu cür əlavələrin istifadəsi düzgün hesab edilmir”-deyə həkim-nutrisioloq bildirib. Daha ətraflı məlumat üçün linkə keçid edə bilərsiniz:
Qida mifləri: Meyvə və tərəvəzləri soyuducuya qoymazdan əvvəl yumaq lazımdır? - Video
AQTİ-nin “Qida mifləri” rubrikasının bu dəfəki buraxlışında meyvə və tərəvəzləri soyuducuya qoymazdan əvvəl yumaq lazımdır sualına cavab verilib. İnstitutun mütəxəssisləri bildirir ki, meyvə və tərəvəzlərin saxlanması və gigiyenası ilə bağlı cəmiyyət arasında geniş yayılmış yanlış təsəvvürlərdən biri onların soyuducuya yerləşdirməzdən əvvəl yuyulmasıdır. Doğru qəbul edilən bu fikir əslində isə həqiqəti əks etdirmir. Daha ətraflı məlumat üçün linkə keçid edə bilərsiniz:
Kardiologiya İnstitutunun direktoru “Erkən kəsimə son!” layihəsinə qoşulub - Video
Elmi-Tədqiqat Kardiologiya İnstitutunun direktoru, professor, tibb elmləri doktoru Gülnaz Dadaşova Azərbaycan Qida Təhlükəsizliyi Agentliyi (AQTA) tərəfindən həyata keçirilən “Erkən kəsimə son!” layihəsinə qoşulub. Gülnaz Dadaşova müraciətində bildirib ki, erkən kəsimin tibbi baxımdan üstünlüyü barədə formalaşan bəzi yanlış fikirlər elmi əsaslara söykənmir: “Körpə quzu əti ilə qoyun əti qırmızı ət kateqoriyasına daxildir və zülal mənbəyidir. Lakin bəzən körpə quzu ətinin guya daha faydalı və ya müalicəvi əhəmiyyət daşıdığı barədə yanlış təsəvvür formalaşdırılır. Bu yanaşmanın heç bir elmi əsası yoxdur.” O, qeyd edib ki, qırmızı ətin həddindən artıq istehlakı xüsusilə risk qrupunda olan insanlar üçün təhlükə yarada bilər: “Hipertoniya və ürək-damar xəstəlikləri riski olan şəxslərdə qırmızı ətin, o cümlədən quzu ətinin normadan artıq istifadəsi ciddi ağırlaşmalara səbəb ola bilər. Bu baxımdan erkən kəsimə yox demək vacibdir.” Ətraflı videolink:
