Giriş
Daşkəsəndə fəaliyyət göstərən aptekdə bioloji aktiv qida məhsulu ilə bağlı pozuntular aşkarlanıb
18 Avqust 2023 17:45
Azərbaycan Respublikasının Qida Təhlükəsizliyi Agentliyi (AQTA) ölkə ərazisində qanunvericiliyin tələbləri çərçivəsində qida təhlükəsizliyinin təmin olunması və istehlakçı hüquqlarının müdafiəsi sahəsində tədbirləri davam etdirir.
Tədbirlər çərçivəsində Agentlik əməkdaşları tərəfindən Daşkəsən rayonu, T.İsmayılov küçəsi 21 ünvanında fəaliyyət göstərən “Dokta” MMC-yə məxsus aptekdə yoxlama həyata keçirilib. Yoxlama zamanı aptekdə qida təhlükəsizliyi sahəsində normativ hüquqi aktların tələblərinin pozulması faktları aşkar olunub. Belə ki, aptekdə satışı həyata keçirilən “Tempukan” əmtəə nişanlı bioloji aktiv qida məhsulunun istifadə təlimatında qanunvericiliyə zidd olaraq, həmin məhsulun insan xəstəliklərinin qarşısının alınması və müalicə xüsusiyyətlərinə malik olması barədə qeydlərin yazıldığı müəyyən edilib. Həmçinin qablaşdırılma üzərində və istifadə təlimatında məhsulun istifadə qaydası barədə dəyişdirilmiş məlumatların verildiyi aşkar olunub.
Eyni zamanda aparılan araşdırma çərçivəsində “Tempukan” məhsulunun “Nes Group” MMC tərəfindən ölkəyə gətirildiyi müəyyən edilib. Həmçinin idxal zamanı sözügedən bioloji aktiv qida məhsulunun qablaşdırılması üzərindəki etiketin və istifadə təlimatının qanunverciliyə uyğun olaraq təmin edildiyi, lakin sonradan idxalçı tərəfindən məlumatlar dəyişdirilərək məhsulların satışa göndərildiyi aşkar olunub.
Aşkarlanmış faktlarla əlaqədar “Dokta” MMC-yə məxsus aptekin vəzifəli şəxsi və “Nes Group” MMC-nin rəhbərliyi barəsində qanunverciliyə uyğun olaraq müvafiq tədbirlər görülüb. Eyni zamanda “Dokta” MMC-də aşkarlanan nöqsanların aradan qaldırılması üçün icrası məcburi göstərişlər verilib. “Nes Group” MMC ilə bağlı isə istifadə təlimatında və qablaşdırılması üzərində müxtəlif xəstəliklərin qarşısının alınmasına dair qeydlərin yazılması, eləcə də istehsalçı tərəfindən tövsiyə edilən istifadə qaydasının dəyişdirilməsi ilə əlaqədar həmin məhsul partiyasına verilmiş qida təhlükəsizliyi sertifikatının ləğv olunması və məhsul partiyasının dövriyyədən geri çağrılması ilə bağlı qərarlar qəbul edilib.
AQTA əhalinin sağlamlığının qorunması və təhlükəsiz qida məhsulları ilə təmin olunması istiqamətində ardıcıl tədbirlərini bundan sonra da davam etdirəcək və istehlakçı hüquqlarının pozulmasına yönəlmiş qanunsuz halların qarşısı alınacaq.
Oxşar xəbərlər
Göygöldə nöqsanlar aşkarlanan kolbasa istehsalı müəssisəsinin fəaliyyəti məhdudlaşdırılıb
Qida Təhlükəsizliyi Agentliyinin əməkdaşları Göygöl rayonunun Qızılqaya qəsəbəsində yerləşən, fiziki şəxs Nağıyev Camal Əli oğluna məxsus kolbasa istehsalı müəssisəsində plandankənar yoxlama keçirib. Baxış zamanı müəssisənin qida təhlükəsizliyi qeydiyyatından keçmədən fəaliyyət göstərdiyi, sanitar-gigiyenik vəziyyətin qida təhlükəsizliyi sahəsində texniki normativ hüquqi aktların tələblərinə cavab vermədiyi, kolbasa məhsullarının saxlanması və qablaşdırılması sahəsində xüsusi temperatur rejiminə əməl edilmədiyi, həmçinin məhsulların etiket məlumatlarında uyğunsuzluq müəyyən olunub. Bundan əlavə, müəssisədə istifadə müddəti bitmiş məhsulların təkrar dövriyyəsi üçün doğrama bıçaqları, kiflənmiş kolbasanın silinməsi üçün duru yağ, istehsal tarixinin silinməsi üçün məhlul, təkrar qablaşdırılma üçün vakuum avadanlığı aşkarlanıb. Faktla bağlı qanunvericiliyə uyğun olaraq müəssisənin fəaliyyəti məhdudlaşdırılıb və icrası məcburi göstərişlər verilib. Araşdırmalar davam etdirilir.
Lənkəranda normativ tələblərin pozulduğu ət satışı məntəqəsinin fəaliyyəti məhdudlaşdırılıb
Daxil olan müraciət əsasında Lənkəran şəhəri, Koroğlu küçəsi, Böyük bazar ərazisində fəaliyyət göstərən, fiziki şəxs Həsənov Allahşükür Atəş oğluna məxsus ət satışı məntəqəsində Qida Təhlükəsizliyi Agentliyinin əməkdaşları tərəfindən keçirilmiş plandankənar yoxlama zamanı qida təhlükəsizliyi sahəsində texniki normativ hüquqi aktların tələblərinin pozulduğu aşkarlanıb. Belə ki, məntəqədə sanitar-gigiyenik tələblərə əməl edilmədiyi, ətlərin üzərində baytarlıq nəzarətindən keçirildiyinə dair möhürün olmadığı, əlyuma çanağının, havalandırma sisteminin, eləcə də ət məhsullarının saxlanması üçün soyuducu və dondurucuların mövcud olmadığı, işçi heyətin tibbi müayinədən keçmədiyi və fərdi qoruyucu vasitələrdən istifadə etmədiyi, dezinfeksiya işlərinin aparılmadığı müəyyən edilib.
Qanunsuz fəaliyyət göstərən dönərxanada bir sıra nöqsanlar aşkarlanıb
Ağdam rayonu, Quzanlı qəsəbəsində fəaliyyət göstərən, fiziki şəxs Əliyev İbrahim Şirin oğluna məxsus dönərxanada Qida Təhlükəsizliyi Agentliyinin əməkdaşları tərəfindən plandankənar yoxlama keçirilib. Baxış zamanı dönərxanada qida məhsulları üzrə gigiyena qaydalarına və qida təhlükəsizliyi tələblərinə əməl edilmədiyi, sanitar-texniki və sanitar-gigiyenik vəziyyətin qüvvədə olan normativlərə cavab vermədiyi müəyyən edilib. Belə ki, iaşə obyektinin qida təhlükəsizliyi qeydiyyatından keçmədən fəaliyyət göstərdiyi məlum olub, həmçinin obyektdə xammal olaraq istifadə edilən məhsulların (xiyar, pomidor, mayonez) açıq şəkildə saxlandığı, çarpaz çirklənmənin qarşısının alınması məqsədilə texnoloji prosesin ardıcıllığına riayət edilmədiyi, əlyuma çanaqlarının isti su və gigiyenik tələblərə cavab verən qurutma vasitələri ilə təmin edilmədiyi, havalandırma sisteminin quraşdırılmadığı, çirklənməyə qarşı müdafiə və zərərvericilərlə mübarizə üçün müvafiq şəraitin olmadığı, döşəmə, divar səthlərinin təmirsiz olduğu və dezinfeksiyaedici vasitələrin təsirinə davamlı materialla üzlənmədiyi, mütəmadi olaraq müvafiq təmizlik işlərinin aparılmadığı, tullantıların ağzı kip bağlanan və qoxu yaymayan qablara toplanmadığı və digər nöqsanlar aşkarlanıb.
