Giriş
Qida məhsullarının idxalı ilə məşğul olan sahibkarlarla görüş keçirilib
14 İyun 2018 00:00
İyunun 14-də Bakı Baş Gömrük İdarəsində qida məhsullarının idxalı ilə məşğul olan sahibkarlarla görüş keçirilib.
Dövlət Gömrük Komitəsi Gömrük Nəzarətinin Təşkili Baş İdarəsinin rəisi, gömrük xidməti general-mayoru Cavad Qasımov, Qida Təhlükəsizliyi Agentliyinin Aparat rəhbəri Rəşad Mafusov və digər rəsmi şəxslərin iştirakı ilə keçirilən görüşün əsas məqsədi qida məhsullarının idxalı ilə məşğul olan sahibkarları iyulun 1-dən tətbiq ediləcək yeni qaydalarla tanış etmək, sahibkarların bu mövzuda rəy və təkliflərini öyrənmək olub.
Qida Təhlükəsizliyi Agentliyinin Aparat rəhbəri R.Mafusov bildirib ki, agentliyin yaradılmasında məqsəd qida təhlükəsizliyi sahəsindəki fəaliyyətləri mərkəzləşmiş qaydada həyata keçirməkdən ibarətdir. Sahibkarlıq subyektlərinin fəaliyyətinin asanlaşdırılması istiqamətində mühüm addımlar atılacağını vurğulayan Aparat rəhbəri agentlik tərəfindən göstərilən xidmətlərin "ASAN xidmət" vasitəsilə həyata keçiriləcəyini ifadə edib.
DGK Baş İdarə rəisi C.Qasımov isə hazırda həm gömrük, həm də qida təhlükəsizliyi sahəsində dərin islahatlar aparıldığını xatırladaraq bu islahatların sahibkarlıq subyektləri və vətəndaşlar üçün səmərəliliyini artırmaq məqsədilə Dövlət Gömrük Komitəsi ilə Qida Təhlükəsizliyi Agentliyi arasında memorandum imzalandığını diqqətə çatdırılıb. O iki qurumun birgə fəaliyyət mexanizmininin yaradılmasının artıq başa çatdırıldığını bildirib, bu istiqamətdə sahibkarların rəy və təkliflərinin öyrənilməsinin də ümumi işə fayda verəcəyini vurğulayıb. İdarə rəisi onu da bildirib ki, tətbiq ediləcək yeni qaydalar həm sərhədkeçmə, həm də gömrük rəsmiləşdirilməsi proseslərinin daha asan və sürətli şəkildə həyata keçirilməsinə şərait yaradacaq.
Sonra Dövlət Gömrük Komitəsi və Qida Təhlükəsizliyi Agentliyinin mütəxəssisləri yeni qaydalar barədə sahibkarlara ətraflı məlumat verib, onların suallarını cavablandırıblar.
Oxşar xəbərlər
Quş qripi xəstəliyinə qarşı keçirilmiş epizootoloji monitorinqin nəticələri açıqlanıb
Quş qripi xəstəliyinə qarşı cari ilin 7-11 aprel tarixlərində keçirilmiş epizootoloji monitorinqin nəticələri açıqlanıb. Tədbir zamanı epizootik risk əsasında müəyyən olunmuş dövlət təbiət yasaqlıqlarının, ovçuluq təsərrüfatlarının və milli parkların su-bataqlıq, dənizsahili zonalar və digər ərazilərini əhatə etməklə, su anbarları və çaysahili ərazilərdə ümumi müşahidələr aparılaraq vəhşi quşlara klinik baxış keçirilib, 62 baş müxtəlif növ vəhşi quşdan diaqnostik nümunələr götürülüb. Bundan əlavə, 40 sənaye əsaslı müxtəlif həcmli quşçuluq müəssisəsində 400 baş, habelə 21 rayonun (şəhər) 243 ailə təsərrüfatından ümumilikdə müxtəlif növ 742 baş ev quşundan laborator müayinə üçün qan və yaxma nümunələri götürülüb. Monitorinq çərçivəsində təbiət ərazilərinə, müxtəlif növ quşçuluq müəssisələrinə, ailə təsərrüfatlarına, su hövzələri, parklar və zooparklara, dekorativ quşların saxlandığı obyektlərə, diri quş satışının həyata keçirildiyi bazarlara ümumi baxış keçirilib, baytarlıq norma və qaydalarına əməl olunması üçün məqsədyönlü maarifləndirmə-təbliğat tədbirləri həyata keçirilib. Monitorinq müddətində vəhşi və ev quşlarından götürülmüş nümunələr müvafiq laboratoriyalarda müayinə edilib. Aparılmış müayinələrin ümumi təhlili zamanı quş qripi xəstəliyinin törədicisi və xəstəliyə şübhəli klinik əlamətləri olan quşa rast gəlinməyib. Ev quşlarından götürülmüş diaqnostik nümunələr Nyukasl xəstəliyinə görə də müayinə edilib və yoluxmaya şübhəli hala rast gəlinməyib. Epizootoloji vəziyyət və götürülmüş nümunələr barədə məlumatlar müvafiq elektron sistemə daxil edilib.
Quş qripi xəstəliyinə qarşı epizootoloji monitorinq keçiriləcək
Qida Təhlükəsizliyi Agentliyi tərəfindən aidiyyəti qurumlarla birgə cari ilin 19-23 may tarixlərində quş qripi xəstəliyinə qarşı növbəti epizootoloji monitorinq keçiriləcək. Monitorinq zamanı ovçuluq təsərrüfatlarının və milli parkların su-bataqlıq, dənizsahili zonalar və digər ərazilərini əhatə etməklə, ərazi ilə yanaşı vəhşi quşlara ümumi baxış keçiriləcək, bəzi sənaye əsaslı müxtəlif həcmli quşçuluq müəssisələrində, o cümlədən müxtəlif rayonlardakı (şəhərlərdəki) ailə təsərrüfatlarında saxlanılan ev quşlarından laborator müayinə aparılması üçün diaqnostik nümunələr götürüləcək. Habelə ölkə üzrə müəssisələrə, təsərrüfatlara, su hövzələrinə və parklara ümumi baxış keçirilməklə, baytarlıq norma və qaydalarına əməl olunması üçün məqsədyönlü maarifləndirmə-təbliğat tədbirləri həyata keçiriləcək və epizootoloji məlumatlar toplanaraq təhlil ediləcək. Tədbirlər müddətində götürülmüş nümunələrin laborator müayinələri aparılacaq. Monitorinq çərçivəsində epizootoloji vəziyyət və götürülmüş nümunələr barədə məlumatlar müvafiq elektron sistemə daxil ediləcək.
Dabaq və quş qripi xəstəliyi ilə bağlı bəzi məhdudiyyətlər tətbiq olunub
Küveyt Dövlətinin Əl-Cəhra əyalətində dabaq, Kamboca Krallığının Kratex əyalətində, Liberiya Respublikasının Bonq bölgəsində, Vyetnam Sosialist Respublikasının Nqhe An, Tiyen Gianq, Tuyen Quanq, Lonq An, Quanq Tri əyalətlərində, Polşa Respublikasının Pomorsk inzibati ərazisində isə yüksək patogen quş qripi xəstəliyi qeydə alınıb. Bu barədə Ümumdünya Heyvan Sağlamlığı Təşkilatından (ÜHST) Azərbaycan Respublikasının Qida Təhlükəsizliyi Agentliyinə rəsmi məlumatlar daxil olub. Respublika ərazisinin qeyd olunan yoluxucu xəstəliklərdən qorunması üçün zonalaşma prinsipi nəzərə alınmaqla, dabaq xəstəliyi baş vermiş təsərrüfatdan 10 km radiusda olan ərazilərdən cütdırnaqlı heyvanların, habelə onlara aid xammal və məhsulların idxalına və tranzit daşınmasına, quş qripi xəstəliyi baş vermiş təsərrüfatdan 10 km radiusda olan məsafədə yerləşən müəssisələrdən isə diri quş və quşçuluq məhsullarının idxalına ÜHST-nin “Quruda yaşayan heyvanların sağlamlıq Məcəlləsi”nə uyğun olaraq, müvəqqəti məhdudiyyət tətbiq olunub. Eyni zamanda müvafiq tədbirlərin görülməsi üçün Azərbaycan Respublikasının Dövlət Gömrük Komitəsinə müraciət olunub.
