Giriş
Sabunçuda qida təhlükəsizliyi tələblərinə əməl etməyən unlu və qənnadı məmulatlarının istehsalı müəssisəsi aşkarlanıb
26 Oktyabr 2022 11:28
Azərbaycan Respublikasının Qida Təhlükəsizliyi Agentliyi (AQTA) qida təhlükəsizliyinin təmin olunması və istehlakçı hüquqlarının müdafiəsi istiqamətində tədbirləri davam etdirir.
Tədbirlər çərçivəsində Agentliyin əməkdaşları tərəfindən Sabunçu rayonu, Bakıxanov qəs., B.Bünyadov küç., məh. 2578 ünvanında fəaliyyət göstərən, hüquqi şəxs “Vüqar MM” MMC-yə məxsus unlu və qənnadı məmulatları istehsalı müəssisəsində plandankənar yoxlama aparılıb.
Yoxlama zamanı müəssisədə qida təhlükəsizliyi sahəsində texniki normativ hüquqi aktların tələblərinə əməl edilmədiyi müəyyən olunub. Müəssisənin yardımçı sahələrində (xammal və hazır məhsul anbarları, soyunub-geyinmə sahəsi və s.) havalandırma sisteminin quraşdırılmadığı, istehsal sahəsindəki havalandırma qurğusunun qeyri-işlək vəziyyətdə olduğu, həmçinin xammal anbarının, istehsal sahəsinin və hazır məhsul anbarının tavanı ilə divarlarının asan yuyula bilən və dezinfeksiyaedici maddələrin təsirinə davamlı materiallarla üzlənmədiyi aşkar edilib. Eyni zamanda, müəssisədə iş prosesində istifadə olunan bəzi alət və avadanlıqların istifadə üçün yararsız olduğu, işçi masaların və lövhələrin taxta materialdan hazırlandığı, soyunub-geyinmə sahəsinin dolablarla təmin edilmədiyi aşkarlanıb. Müəssisədə təmizlik ləvazimatlarının və yuyucu maddələrin saxlanması, eləcə də içilərin qidalanması üçün ayrıca sahənin ayrılmadığı, xammal və hazır məhsul anbarındakı məhsulların döşəmə və divardan ara məsafəsi gözlənilmədən yığıldığı, istehsal sahəsinin pəncərələrində həşaratlara qarşı qoruyucu torların quraşdırılmadığı da müəyyən olunub.
Yoxlama zamanı müəssisədə təmizlik işlərinin aparılmasına dair xüsusi ixtisaslaşmış qurumla bağlanmış müqavilə və bu işlərin görülməsinə dair təsdiqedici sənədlər təqdim edilməyib.
Aşkar edilmiş pozuntularla bağlı müəssisənin rəhbərliyi inzibati məsuliyyətə cəlb olunub.
AQTA əhalinin sağlam qida ilə təmin edilməsi sahəsində mütəmadi olaraq müvafiq tədbirlər həyata keçirir.
Oxşar xəbərlər
İctimai iaşə müəssisələrində aşkar edilmiş nöqsanlar aradan qaldırılıb
Azərbaycan Respublikası Qida Təhlükəsizliyi Agentliyinin apardığı plandankənar yoxlamalar zamanı Bakı şəhərində fəaliyyət göstərən bir sıra ictimai iaşə və qida məhsullarının satışı ilə məşğul olan müəssisələrdə aşkarlanmış nöqsanların aradan qaldırılması istiqamətində müvafiq sağlamlaşdırma tədbirləri həyata keçirilib. Belə ki, Xətai, Yasamal və Suraxanı rayonlarında fəaliyyət göstərən 3 müəssisədə keçirilmiş yoxlamalar zamanı müəyyən edilmiş nöqsanlar müəssisə sahibləri tərəfindən aradan qaldırılıb. Görülmüş tədbirlər nəticəsində ictimai iaşə müəssisələrində aşkar edilmiş uyğunsuzluqlar aradan qaldırılıb və fəaliyyətin davam etdirilməsinə şərait yaradılıb. Sağlamlaşdırma tədbirləri həyata keçirilən müəssisələr aşağıdakılardır: 1. Fiziki şəxs Rəhimov Fərid Mübariz oğluna məxsus Bakı şəhəri, Nəsimi rayonu, Mir Cəlal 4 mkr, ev 18A ünvanında yerləşən “Köhnə ciyərxana” kafesi; 2. Fiziki şəxs Zamanov Nəsimi Səməd oğluna məxsus Bakı şəhəri, Nəsimi rayonu, Mir Cəlal küçəsi, 18/3 (93 saylı mağaza) ünvanında yerləşən “Köhnə ciyərxana” kafesi; 3.Fiziki şəxs Bayramov Emin Varımcan oğluna məxsus Bakı şəhəri, Xəzər rayonu, Şüvəlan qəsəbəsi, A.İldırım küçəsi, 37C ünvanında yerləşən “Halva” kafesi;
Masallıda qanunsuz toyuq kəsimi sexləri aşkarlandı – Fəaliyyətləri məhdudlaşdırıldı
Azərbaycan Respublikası Qida Təhlükəsizliyi Agentliyinin əməkdaşları Masallı rayonu, İsgəndərli qəsəbəsində Rəsulov Taleh Seyran oğluna məxsus toyuq kəsimi sexində, Digah kəndində isə Paşayev Füzuli İbrahim oğluna məxsus toyuq kəsimi sahəsində yoxlama keçirib. Yoxlama zamanı hər iki qida obyektində quşların müvafiq müşayiətedici sənədlərinin olmaması, sanitar-gigiyenik və sanitar-texniki tələblərin pozulması və digər nöqsanlar aşkarlanıb. Hər iki sahibkar barəsində inzibati protokol tərtib edilib, məhdudlaşdırıcı tədbirlərin tətbiqi barədə qərar qəbul olunub, toyuq məhsullarından nümunələr götürülərək laborator müayinələrə cəlb edilib. Araşdırmalar davam etdirilir.
Nəzarət tədbirləri - İcmal
AQTA tərəfindən keçirilən plandankənar yoxlamalar zamanı Bakı şəhərində, Bərdə və Masallı rayonlarında fəaliyyət göstərən qida obyektlərində sanitariya-gigiyena tələblərinin pozulması və digər nöqsanlar müəyyən edilib. Aşkarlanmış pozuntularla bağlı obyektlərin fəaliyyətinin məhdudlaşdırılması istiqamətində tədbirlər görülüb.
