Giriş
Sağlam qidalanma ilə bağlı əl kitabçası hazırlanır
21 May 2021 12:30
Azərbaycan Qida Təhlükəsizliyi İnstitutu (AQTİ) tərəfindən maarifləndirmə tədbirləri davam etdirilir.
Həyata keçirilən maarifləndirmə tədbirləri çərçivəsində İnstitutunun əməkdaşları tərəfindən “Sağlam qidalanma” əl kitabçası hazırlanır. Sözügedən kitabçada “Sağlam qidalanma nədir”, “Gündəlik istehlak normaları”, “İnsan orqanizmində vitamin və mineralların əhəmiyyəti”, “Sağlam qida rasionunun tərtibi”, “Xəstəliklər zamanı qidalanma”, “Zərərli qidalar”, “Qida zərərvericiləri”, “Sağlam menyu” başlıqları altında maraqlı məlumatlar dərc olunacaq. Ümumilikdə kitabçada qida məhsullarının tərkibinə görə qruplaşdırılması (yağ, zülal, karbohidrat tərkibli və lifli qidalar), gündəlik istehlak edilən təzə və quru meyvələr, tərəvəzlər, un məmulatları, qənnadı məmulatları, ət və ət məhsulları, paxlalılar, süd və süd məhsulları, yağ, şəkər, duz və mayenin gündəlik istehlak normaları, qida məhsullarının tərkibindəki minerallar və vitaminlərin insan orqanizminə təsirləri kimi məsələlərin əhatə edilməsi nəzərdə tutulur. Həmçinin körpələr, uşaqlar, yeniyetmələr, gənclər, yetkin və yaşlı insanlar, hamilə və süd verən qadınlar, vegeterianlar, idmançılar üçün sağlam qida rasionu, o cümlədən diabet, ürək-damar, onkoloji, həzm sistemi, təzyiq, qalxanvari vəzin xəstəlikləri və allergiya zamanı düzgün və sağlam qidalanma qaydaları da kitabçada öz əksini tapacaq. Kitabçada zərərli qidalar, qida zəhərlənmələri, qida məhsullarının düzgün saxlanma qaydaları haqqında da məlumatlar veriləcək. Kitabçanın sonunda “Sağlam menyu” bölməsində detoks təsirə malik kokteyllər, sağlam qızartmalar, salatlar, şorbalar haqqında məlumatların verilməsi də nəzərdə tutulur.
Nəzərə almaq lazımdır ki, qidalanmanın sağlam şəkildə olması orqanizmin digər funksiyalarının da düzgün formada yerinə yetirilməsini və sağlam gələcəyi təmin edir. Məhz bu baxımdan, ölkəmizdə əhalinin sağlam qidalanma barədə maarifləndirilməsi böyük əhəmiyyət kəsb edir.
Oxşar xəbərlər
Lənkəranda normativ tələblərin pozulduğu ət satışı məntəqəsinin fəaliyyəti məhdudlaşdırılıb
Daxil olan müraciət əsasında Lənkəran şəhəri, Koroğlu küçəsi, Böyük bazar ərazisində fəaliyyət göstərən, fiziki şəxs Həsənov Allahşükür Atəş oğluna məxsus ət satışı məntəqəsində Qida Təhlükəsizliyi Agentliyinin əməkdaşları tərəfindən keçirilmiş plandankənar yoxlama zamanı qida təhlükəsizliyi sahəsində texniki normativ hüquqi aktların tələblərinin pozulduğu aşkarlanıb. Belə ki, məntəqədə sanitar-gigiyenik tələblərə əməl edilmədiyi, ətlərin üzərində baytarlıq nəzarətindən keçirildiyinə dair möhürün olmadığı, əlyuma çanağının, havalandırma sisteminin, eləcə də ət məhsullarının saxlanması üçün soyuducu və dondurucuların mövcud olmadığı, işçi heyətin tibbi müayinədən keçmədiyi və fərdi qoruyucu vasitələrdən istifadə etmədiyi, dezinfeksiya işlərinin aparılmadığı müəyyən edilib.
Qanunsuz fəaliyyət göstərən dönərxanada bir sıra nöqsanlar aşkarlanıb
Ağdam rayonu, Quzanlı qəsəbəsində fəaliyyət göstərən, fiziki şəxs Əliyev İbrahim Şirin oğluna məxsus dönərxanada Qida Təhlükəsizliyi Agentliyinin əməkdaşları tərəfindən plandankənar yoxlama keçirilib. Baxış zamanı dönərxanada qida məhsulları üzrə gigiyena qaydalarına və qida təhlükəsizliyi tələblərinə əməl edilmədiyi, sanitar-texniki və sanitar-gigiyenik vəziyyətin qüvvədə olan normativlərə cavab vermədiyi müəyyən edilib. Belə ki, iaşə obyektinin qida təhlükəsizliyi qeydiyyatından keçmədən fəaliyyət göstərdiyi məlum olub, həmçinin obyektdə xammal olaraq istifadə edilən məhsulların (xiyar, pomidor, mayonez) açıq şəkildə saxlandığı, çarpaz çirklənmənin qarşısının alınması məqsədilə texnoloji prosesin ardıcıllığına riayət edilmədiyi, əlyuma çanaqlarının isti su və gigiyenik tələblərə cavab verən qurutma vasitələri ilə təmin edilmədiyi, havalandırma sisteminin quraşdırılmadığı, çirklənməyə qarşı müdafiə və zərərvericilərlə mübarizə üçün müvafiq şəraitin olmadığı, döşəmə, divar səthlərinin təmirsiz olduğu və dezinfeksiyaedici vasitələrin təsirinə davamlı materialla üzlənmədiyi, mütəmadi olaraq müvafiq təmizlik işlərinin aparılmadığı, tullantıların ağzı kip bağlanan və qoxu yaymayan qablara toplanmadığı və digər nöqsanlar aşkarlanıb.
Qida təhlükəsizliyi tələblərinin pozulduğu iki dönərxananın fəaliyyəti məhdudlaşdırılıb
Ağcabədi rayonunun N.Nərimanov küçəsində yerləşən, fiziki şəxs Alıyev Xəyyam Mirzəli oğluna məxsus “01” dönərxanasında və Xocavənd kəndində yerləşən, fiziki şəxs Hüseynov Elmir Əmirxan oğluna məxsus “Dostluq” dönərxanasında Qida Təhlükəsizliyi Agentliyinin əməkdaşları tərəfindən plandankənar yoxlama keçirilib. Baxış zamanı dönərxanalarda qida məhsulları üzrə gigiyena qaydalarına və qida təhlükəsizliyi tələblərinə əməl edilmədiyi, sanitar-texniki və sanitar-gigiyenik vəziyyətin qüvvədə olan normativlərə cavab vermədiyi müəyyən olunub. Belə ki, iaşə obyektlərində çarpaz çirklənmənin qarşısının alınması məqsədilə texnoloji prosesin ardıcıllığına əməl olunmadığı, qabaqcıl gigiyena təcrübəsinin, o cümlədən çirklənməyə qarşı müdafiə və zərərvericilərlə mübarizə üçün müvafiq şəraitin təmin edilmədiyi, döşəmə, divar səthlərinin təmirsiz olduğu və dezinfeksiyaedici vasitələrin təsirinə davamlı materialla üzlənmədiyi, mütəmadi olaraq müvafiq təmizlik işlərinin görülmədiyi, tullantıların ağzı kip bağlanan və qoxu yaymayan qablara toplanmadığı, işçi heyətin gigiyenik təlimlərə cəlb edilmədiyi və digər nöqsanlar aşkarlanıb.
