Giriş
“Süfrə” jurnalının növbəti sayı işıq üzü görüb
3 Mart 2021 15:34
Azərbaycan Qida Təhlükəsizliyi İnstitutunun (AQTİ) mətbu orqanı olan “Süfrə” elmi-kütləvi jurnalının növbəti – 6-cı sayı çapdan çıxıb.
“Süfrə” jurnalının bu sayında da bir-birindən maraqlı rubrikalar oxuculara təqdim olunub. Belə ki, “Bələdçi” rubrikasında Ağdamın simvolu sayılan “Çay evi”, “Üzümçülər evi” və Çörək muzeyinin maraqlı tarixçəsi ilə tanış ola bilərsiniz. “Persona” rubrikasında hərbi diktor Şəmistan Əlizamanlı və II Vətən müharibəsində döyüşmüş 20-dən çox AQTA əməkdaşından biri olan Tural Məmmədovun atası Knyaz Məmmədovla müsahibəni oxumaq mümkündür.
Həmçinin, “Milli qida” rubrikasında dərc olunmuş məqalədə narşərabın orqanizm üçün faydası, düzgün hazırlanması və uzun müddət saxlanması üçün zəruri məlumatlar, “Qida akademiyası” rubrikasında isə balıq əti və balıq məhsullarının tərkibi, bioloji xüsusiyyətləri, eləcə də təhlükəsizlik göstəriciləri barədə məlumatlar əksini tapıb.
Ölkədə qida zəncirinin bütün mərhələlərində fəaliyyət göstərən sahibkarlıq subyektlərinin qida təhlükəsizliyi qeydiyyatı ilə bağlı məlumatlar “Qida biznesi” rubrikasında əksini tapıb ki, bu da jurnalın sahibkarlıq fəaliyyəti ilə məşğul olan oxucu auditoriyası üçün nəzərdə tutulur.
Xalq artisti Rasim Balayevin “Arxadan vurulan zərbə” filmindən maraqlı süfrə səhnələri barədə xatirələri “Kinomenyu” rubrikasında, şəkərli diabetdən qorunmaq üçün zəruri tövsiyələr isə “Həkim sözü” rubrikasında yer alıb.
Jurnalın 6-cı sayında “Şəhər damlarında bostanlar”, “Uşaqlar üçün ən ziyanlı 10 qida”, “Sultan və kraliçaların cib qovunu – şamama”, “Sağlam qida tətbiqləri”, “Qənaətli bazarlıq sirləri”, “Kəklikotu ətri” və “Qarabağ mətbəxi: tarixi, özəlliyi” kimi məqalələr də təqdim olunub.
Qeyd edək ki, “Süfrə” jurnalını əldə etmək üçün (012) 565-12-72 (daxili nömrə - 015) telefon nömrəsi ilə əlaqə saxlaya bilərsiniz.
Oxşar xəbərlər
Sumqayıtda fəaliyyət göstərən kafedə nöqsanlar aşkarlanıb
Sumqayıt şəhəri, 5-ci mikrorayon, N.Nərimanov küçəsi 36 ünvanında fəaliyyət göstərən, fiziki şəxs Rəhimov Səxavət İmran oğluna məxsus “Dostluq” kafesində Qida Təhlükəsizliyi Agentliyinin əməkdaşları tərəfindən yoxlama keçirilib. Baxış zamanı müəssisədə sanitar-gigiyenik və sanitar-texniki vəziyyətin qənaətbəxş olmadığı, məhsulların saxlanması zamanı temperatur rejiminə əməl edilmədiyi, işçi heyətin tibbi müayinədən keçmədiyi və digər nöqsanlar müəyyən olunub. Həmçinin soyuducuda etiketlənməsi aparılmayan qida məhsulları aşkarlanıb. Faktla bağlı müəssisənin fəaliyyətinə nöqsanlar aradan qaldırılanadək müvəqqəti məhdudiyyət qoyulub, rəhbəri barəsində inzibati qərar qəbul edilərək cərimə tətbiq edilib və qanunvericiliyə uyğun zəruri tədbirlər görülüb.
“Qurd Qapısı” restoranında ciddi nöqsanlar aşkarlandı
Bakı şəhəri, Yasamal rayonu, M.Müşfiq küçəsində yerləşən, fiziki şəxs İsmayılova Fizulət Eldar qızına məxsus “Qurd Qapısı” restoranında Qida Təhlükəsizliyi Agentliyinin əməkdaşları tərəfindən yoxlama keçirilib. Baxış zamanı müəssisədə sanitar-texniki və sanitar-gigiyenik tələblərə əməl olunmadığı, emal sahəsində texnoloji ardıcıllıq prinsipinin pozulduğu, qida məhsullarının saxlanması ilə bağlı tələblərin yerinə yetirilmədiyi, soyuducu və dondurucuda müxtəlif ət məhsullarının çirklənmədən mühafizə ediləcək şəraitdə saxlanılmadığı, quru xammal anbarının və işçilər üçün soyunub-geyinmə sahəsinin təşkil olunmadığı, qida ilə təmasda olan səthlərin asan yuyulub təmizlənə bilən materialla üzlənmədiyi məlum olub. Bununla yanaşı, yoxlama zamanı yeməklərin hazırlanması və ət emalı sahəsində mexaniki havalandırma sisteminin quraşdırılmadığı, emal sahəsində divarların tamlığının pozulduğu, soyuducu rəflərdə korroziya əlamətlərinin olduğu, işçi heyətin tibbi müayinədən keçmədiyi və gigiyenik təlimə cəlb olunmadığı, həmçinin istehlaka təqdim edilən ətlərin müvafiq müşayiətedici sənədlərinin olmadığı müəyyən edilib. Faktla bağlı sahibkar barəsində inzibati protokol tərtib edilib, iaşə müəssisəsinin açıq sahəsində isti yeməklərin hazırlanması ilə bağlı fəaliyyətinə nöqsanlar aradan qaldırılanədək müvəqqəti məhdudiyyət qoyulub və icrası məcburi göstərişlər verilib. Məhsullardan nümunələr götürülərək laborator müayinələrə cəlb olunub. Araşdırmalar davam etdirilir.
“Top Qapı” restoranının sahibi barəsində inzibati icraata başlandı
Xəbər verildiyi kimi, Bakı şəhəri, Nərimanov rayonu, Əhmədbəy Ağa oğlu 26 ünvanında fəaliyyət göstərən fiziki şəxs Dadaşov Pərviz Almas oğluna məxsus “Top Qapı” ictimai iaşə müəssisəsində AQTA əməkdaşları tərəfindən keçirilən yoxlama zamanı ciddi nöqsanlar aşkarlanıb və qida obyektinin mətbəx sahəsinin fəaliyyəti həmin nöqsanlar aradan qaldırılanadək müvəqqəti məhdudlaşdırılıb. Agentlik tərəfindən həmin qərarın icra vəziyyətinin yerində yoxlanılması məqsədilə aparılan baxış zamanı “Top Qapı” restoranının məhdudlaşdırıcı tədbirlərin tətbiqi barədə qərara əməl etmədən və göstərilən nöqsanlar tam aradan qaldırılmadan fəaliyyət göstərdiyi və müəssisədə təmir işlərinin aparıldığı bir vaxtda müxtəlif qidaların emal olunduğu müəyyən edilib. Faktla bağlı sahibkar barəsində qida təhlükəsizliyi sahəsində dövlət nəzarətinin həyata keçirilməsi çərçivəsində Agentliyin qanuni yazılı tələblərini (qərarlarını) yerinə yetirməməyə görə İnzibati Xətalar Məcəlləsinə uyğun olaraq inzibati icraata başlanılıb və müəssisənin mətbəx sahəsinə nöqsanlar tam aradan qaldırılanadək yenidən müvəqqəti məhdudiyyət tətbiq olunub.
