Giriş
Ümummilli Liderin anadan olmasının 103-cü ildönümünə həsr olunmuş "III Qida sənayesi və qida təhlükəsizliyi" Forumu keçirilib
17 Aprel 2026 17:51
Azərbaycan Qida Təhlükəsizliyi İnstitutu (AQTİ) və Azərbaycan Texnologiya Universitetinin (ATU) birgə təşkilatçılığı ilə Ümummilli Lider Heydər Əliyevin anadan olmasının 103-cü ildönümünə həsr olunmuş “III Qida sənayesi və qida təhlükəsizliyi” Forumu keçirilib.
Tədbirdən əvvəl Ulu Öndərin Gəncə şəhərinin baş meydanında ucaldılan abidəsi ziyarət edilib, önünə gül dəstələri düzülüb.
Gəncə şəhər Heydər Əliyev Mərkəzində baş tutan forum Azərbaycan Respublikasının Dövlət Himninin səsləndirilməsi, Ulu Öndər Heydər Əliyevin, eləcə də torpaqlarımızın ərazi bütövlüyü uğrunda canından keçən şəhidlərin əziz xatirəsinin yad edilməsilə açıq elan edilib.
ATU-nun rektoru Yaşar Ömərov tədbirdə giriş sözü ilə çıxış edərək forumun əhəmiyyətindən danışıb. O bildirib ki, ənənə halını alan və artıq üçüncü dəfə keçirilən forum ölkə əhəmiyyətli platforma kimi qida sənayesi və qida təhlükəsizliyi sahəsində mütəxəssisləri bir araya gətirir. Rektor vurğulayıb ki, aparılacaq müzakirələr sahənin inkişafına, elmi nəticələrin istehsalatda tətbiqinə və qida təhlükəsizliyinin təmin olunmasına mühüm töhfə verəcək.
Forumun rəsmi hissəsində Azərbaycan Qida Təhlükəsizliyi Agentliyinin sədrinin müşaviri Seymur Mövlayev, Azərbaycan Qida Təhlükəsizliyi İnstitutunun İdarə heyətinin sədrinin müavini Elina Sulyayeva və digər rəsmilər çıxış edərək forumun əhəmiyyətindən danışıblar.
Qeyd olunub ki, Azərbaycan xalqının Ümummilli Lideri Heydər Əliyev müstəqil dövlətimizin qurucusu kimi öz dərin zəkası, uzaqgörənliyi və müdrik siyasi baxışı ilə yalnız dövlətçiliyimizin əsaslarını yaratmaqla kifayətlənməyib, eyni zamanda milli iqtisadi inkişaf modelinin möhkəm təməlini formalaşdırıb. Bu gün həmin strateji kurs Prezident İlham Əliyev tərəfindən uğurla davam etdirilir və ölkəmizin sosial-iqtisadi inkişafı dayanıqlı şəkildə təmin olunur. Vurğulanıb ki, məhz bu inkişaf fonunda qida təhlükəsizliyi məsələləri daim diqqət mərkəzində saxlanılır, bu sahədə kompleks, risk əsaslı və sistemli tədbirlərin həyata keçirilməsi davam etdirilir.
Tədbirin davamında qida sənayesi və qida təhlükəsizliyi ilə bağlı aktual məsələlərin müzakirə olunduğu iki panel sessiyası təşkil edilib. Panel çıxışlarında sahənin müasir çağırışları və inkişaf perspektivləri ətraflı şəkildə diqqətə çatdırılıb.
AQTA sədrinin müşaviri Seymur Mövlayev qida sənayesində HACCP prinsiplərinin tətbiqi, bu yanaşmanın istehsal prosesində risklərin minimuma endirilməsi və məhsul keyfiyyətinin yüksəldilməsində yaratdığı üstünlüklər barədə ətraflı məlumat verib.
AQTİ-nin İdarə heyətinin sədrinin müavini Elina Sulyayeva çıxışında qida təhlükəsizliyinin təmin olunmasında müasir laboratoriya infrastrukturunun əhəmiyyətini vurğulayıb, bu sahədə innovativ yanaşmaların rolundan danışıb. Panel müzakirələri çərçivəsində ağıllı istehsal konsepsiyaları, beynəlxalq keyfiyyət standartlarının tətbiqi, qlobal bazarda rəqabət imkanlarının genişləndirilməsi, həmçinin qida sənayesində keyfiyyət indikatorlarının formalaşdırılması kimi mühüm mövzular ətrafında fikir mübadiləsi aparılıb.
Qeyd edək ki, forumda qida sənayesi sahəsini təmsil edən yerli və xarici ekspertlər, dövlət və özəl sektor nümayəndələri, müvafiq ixtisaslar üzrə təhsil alan tələbələr, eləcə də gənc müəllim və alimlər fəal iştirak ediblər.
Oxşar xəbərlər
AQTA nümayəndəsi EPPO-nun 76-cı sessiyasında iştirak edib
Fransanın Paris şəhərində Avropa və Aralıq dənizi Bitki Mühafizəsi Təşkilatının (EPPO) Şurasının 76-cı sessiyası keçirilib. İclas çərçivəsində EPPO-nun 2026–2030-cu illər üzrə Strateji Planının icrası, növbəti dövr üçün prioritetlərin müəyyənləşdirilməsi, eləcə də təşkilatın əsas vəzifələri və fəaliyyət istiqamətləri müzakirə olunub. EPPO-ya üzv ölkələrin nümayəndələrinin iştirak etdiyi sessiyada bitki sağlamlığı sahəsində regional standartların hazırlanması və yenilənməsi, təşkilatın növbəti dövr üzrə fəaliyyət istiqamətləri və iş proqramı, büdcə və digər təşkilati məsələlər nəzərdən keçirilib, müvafiq qərarlar qəbul edilib. Sessiyanın yekununda təşkilatın 75 illik yubileyinə həsr olunmuş rəsmi tədbir keçirilib. Tədbirdə EPPO-nun regional bitki mühafizəsi və bitki sağlamlığı sahəsində üzv ölkələr arasında əməkdaşlığın inkişafına, elmi və texniki məlumat mübadiləsinə, fitosanitar tədbirlərin uyğunlaşdırılmasına və bitki sağlamlığının qorunmasına verdiyi töhfələr vurğulanıb. Şuranın iclasında Azərbaycanı Azərbaycan Respublikası Qida Təhlükəsizliyi Agentliyinin Bitki sağlamlığı və bioloji təhlükəsizlik şöbəsinin müdiri, Azərbaycan Respublikasının baş dövlət fitosanitar müfəttişi Elmar Allahverdiyev təmsil edib.
Ev üsulu konserv məhsullarından istifadə zamanı diqqətli olmaq vacibdir - Video
Ev şəraitində hazırlanan konserv məhsullarının təhlükəsizliyi xammalın düzgün seçilməsi, sanitariya-gigiyena qaydalarına və texnoloji tələblərə əməl olunması, kifayət qədər istilik emalı və düzgün saxlanma şəraitindən asılıdır. Bu tələblərə əməl edilmədikdə, xüsusilə ət, balıq, tərəvəz, göbələk və digər azturşulu məhsullarda botulizm də daxil olmaqla qida zəhərlənmələri riski yarana bilər. Konserv məhsulları alınarkən qablaşdırmanın bütövlüyünə və qapağın vəziyyətinə diqqət yetirilməlidir. Qapağı şişmiş, qablaşdırması zədələnmiş, sızma olan, həmçinin rəngində, qoxusunda və görünüşündə dəyişiklik müşahidə edilən məhsullar istehlak edilməməlidir. Məhsulun xarici görünüşünün normal olması isə onun təhlükəsizliyinə tam zəmanət vermir. Satışa təqdim olunan ev üsulu konserv məhsulları barədə hazırlanma tarixi, yararlılıq müddəti və saxlanma şəraiti kimi zəruri məlumatlar təqdim edilməlidir. Mənşəyi və saxlanma şəraiti məlum olmayan, qablaşdırılması şübhə doğuran məhsulların alınmasından çəkinmək tövsiyə olunur. Təhlükəsizliyi ilə bağlı şübhə yaranan konserv məhsullarını istehlak etməyin. Şübhəli hallarla qarşılaşdıqda Azərbaycan Respublikasının Qida Təhlükəsizliyi Agentliyinin “1003 Çağrı Mərkəzi”nə müraciət edin. Link:
Azərbaycan Kodeks Alimentarius Komissiyasının Avropa regionu üzrə Koordinatoru olacaq
Azərbaycan Kodeks Alimentarius Komissiyasının Avropa regionu üzrə Koordinatoru olacaq. Belə ki, Almaniyanın paytaxtı Berlində BMT-nin Ərzaq və Kənd Təsərrüfatı Təşkilatı (FAO) və Ümumdünya Səhiyyə Təşkilatının (ÜST) Avropa üzrə Kodeks Koordinasiya Komitəsinin 34-cü sessiyası keçirilib. Almaniyanın Koordinator ölkə kimi səlahiyyət müddətinin başa çatması ilə əlaqədar bu funksiyanın növbəti dövr üçün Azərbaycan tərəfindən həyata keçirməsi təklif olunub. Komitənin 52 üzvü Azərbaycanın namizədliyini yekdilliklə dəstəkləyib. Kodeks Alimentarius Komissiyasının növbəti sessiyasından etibarən Azərbaycan öz funksiyasının icrasına başlayacaq. Azərbaycanın Koordinator kimi əsas vəzifələrindən biri Avropa regionu ölkələri arasında Kodeks Alimentarius Komissiyasının fəaliyyəti, qida təhlükəsizliyi və qida məhsullarına dair beynəlxalq standartların tətbiqi ilə bağlı əməkdaşlığın əlaqələndirilməsinə töhfə verməklə komitənin rəhbərliyini həyata keçirmək olacaq. Qeyd edək ki, 21-25 sentyabr tarixlərində baş tutan sessiyada Azərbaycan Respublikası Qida Təhlükəsizliyi Agentliyi sədrinin müavini Zəkiyyə Mustafayeva və Azərbaycan Qida Təhlükəsizliyi İnstitutunun İdarə Heyətinin sədri Ramazan Nəbiyev iştirak ediblər. Ətraflı:
