Giriş
Heyvanların identifikasiyası fermerlər və istehlakçılar üçün hansı üstünlükləri yaradır?
3 Avqust 2026 17:34
Azərbaycan Respublikasının Qida Təhlükəsizliyi Agentliyinə (AQTA) daxil olan müraciətlər arasında heyvanların identifikasiyası sistemi ilə bağlı suallar üstünlük təşkil edir. Vətəndaşları maraqlandıran əsas məsələlərdən biri bu sistemin tətbiqinin məqsədi və onun fermerlər, eləcə də istehlakçılar üçün yaratdığı üstünlüklərdir.
Heyvanların identifikasiyası hər bir heyvana unikal identifikasiya nömrəsinin verilməsi və həmin heyvan barədə məlumatların vahid informasiya sistemində qeydiyyata alınmasını nəzərdə tutur. Bu məlumatlara heyvanın sahibi, saxlanıldığı təsərrüfat, aparılmış peyvənd və müalicə tədbirləri, həmçinin digər baytarlıq məlumatları daxildir.
Identifikasiya sistemi yoluxucu heyvan xəstəliklərinin erkən aşkarlanmasına, onların yayılmasının qarşısının alınmasına, epizootik vəziyyətə operativ nəzarətin təmin edilməsinə və baytarlıq tədbirlərinin daha səmərəli planlaşdırılaraq həyata keçirilməsinə imkan yaradır.
Sistem fermerlər üçün də mühüm üstünlüklər yaradır. Belə ki, identifikasiya olunmuş heyvanın itməsi və ya oğurlanması hallarında identifikasiya nişanı heyvanın sahibinin müəyyən edilməsini asanlaşdırır və zərurət yarandıqda hüquqi sübut kimi istifadə oluna bilir. Bununla yanaşı, heyvanların qeydiyyatının aparılması təsərrüfatlarda uçotun dəqiq təşkilinə, heyvanların hərəkətinin izlənilməsinə və baytarlıq xidmətlərinin daha səmərəli göstərilməsinə şərait yaradır.
Heyvanların identifikasiyası istehlakçılar üçün də mühüm əhəmiyyət daşıyır. Bu sistem vasitəsilə heyvan mənşəli qida məhsullarının istehsal zəncirinin "Fermadan süfrəyədək" izlənilməsi mümkün olur. Nəticədə məhsulun mənşəyini müəyyən etmək, qida təhlükəsizliyini təmin etmək və zərurət yarandıqda risk daşıyan məhsulları operativ şəkildə dövriyyədən çıxarmaq mümkün olur. Bu isə istehlakçıların sağlamlığının qorunmasına və qida məhsullarına olan etimadın artırılmasına xidmət edir.
Oxşar xəbərlər
AQTA, Səhiyyə Nazirliyi və TƏBİB-in birgə məlumatı
Samux rayonu üzrə qeydə alınan qarayara hadisəsi ilə bağlı ilkin epidemioloji araşdırmalara əsasən xəstəliyə şübhəli bilinən şəxslərin iribuynuzlu heyvanlarla təması müəyyən edilib. Xəstəliyə şübhəli olan ilk şəxsdən götürülmüş müayinə materialının laborator müayinəsi nəticəsində “qarayara xəstəliyi” diaqnozu təsdiq edilmişdir. Hazırda təmasda olan şəxslər müəyyənləşdirilmış, tibbi müşahidəyə cəlb edilmiş və hər hansı dəri yarası olan şəxslərdən laborator müayinələrin aparılması üçün nümunələr toplanılmışdır. Xəstə heyvanla təmasda olan 9 nəfər şəxs aşkarlanaraq Abbas Səhhət adına Gəncə Şəhər Birləşmiş Xəstəxanasının yoluxucu xəstəliklər şöbəsində izolyasiya edilmişdir. Xəstəliklə təmasda olan şəxslər əsasən Samux rayon sakinləridir. Sözügedən şəxslərdən laborator müayinə üçün nümunələr toplanmış və Şəmkir Regional Xüsusi Təhlükəli İnfeksiyalara Nəzarət Mərkəzinə göndərilmişdir.
Ağdaş heyvan satışı bazarı fəaliyyətə başlayıb
Ağdaş rayonunda yerləşən iri və xırdabuynuzlu heyvan satışı bazarı fəaliyyətini bərpa edib. Azərbaycan Qida Təhlükəsizliyi Agentliyinin (AQTA) qiymətləndirilməsindən sonra müasir baytarlıq-sanitariya və biotəhlükəsizlik tələblərinə uyğun yenidən təşkil olunub. Bazarda baytarlıq nəzarətinin həyata keçirilməsi üçün müvafiq şərait yaradılıb, kliniki baxış platforması, dezbaryerlər, izolyatorlar, heyvanların çəkisinin və bədən temperaturunun ölçülməsi üçün müvafiq avadanlıqlar quraşdırılıb.
Heyvan kəsimi məntəqələrində monitorinqlər aparılıb
Azərbaycan Respublikasının Qida Təhlükəsizliyi Agentliyi (AQTA) tərəfindən qida təhlükəsizliyinin təmin olunması, baytarlıq-sanitariya və sanitariya-gigiyena qaydalarına əməl olunmasına nəzarət məqsədilə respublika üzrə fəaliyyət göstərən kəsim məntəqələrində növbəti monitorinqlər həyata keçirilib.
