Giriş
AQTA ilə Litva Respublikasının müvafiq qurumu arasında görüş keçirilib
12 Fevral 2021 12:23
AQTA ilə Litva Respublikasının Kənd Təsərrüfatı yanında Dövlət Bitki Xidmətinin nümayəndə heyətləri arasında görüş keçirilib.
Agentliyin Aparat rəhbəri Elxan Mikayılov və Litva Respublikasının Kənd Təsərrüfatı yanında Dövlət Bitki Xidmətinin direktoru Sergejus Fedotovasın başçılıq etdiyi nümayəndə heyətlərinin iştirak etdiyi görüşdə fitosanitar sertifikatların istifadəsi ilə bağlı qarşılıqlı məsləhətləşmələr, idxal, ixrac, təkrar ixrac və tranzit əməliyyatları zamanı karantin zərərvericilərinin daxil olmasının qarşısını almaq üçün zəruri tədbirlərin görülməsi ilə bağlı təcrübə mübadiləsi müzakirə olunub. Agentlik tərəfindən Litva tərəfinə təqdim edilmiş “Azərbaycan Respublikası ilə Litva Respublikası arasında bitki karantini və mühafizəsi sahəsində əməkdaşlıq haqqında Saziş”in hazırlanması prosesinin surətləndirilməsi diqqətə çatdırılıb. Bununla yanaşı, Azərbaycan Qida Təhlükəsizliyi İnstitutunun Mərkəzi Fitosanitar Laboratoriyası ilə Litva Fitosanitar Tədqiqat Laboratoriyası arasında mümkün əməkdaşlıq barədə müzakirələr aparılıb.
Daha sonra Litva Respublikasının Dövlət Bitki Xidmətinin direktoru Sergejus Fedotovasın təmsil etdiyi qurumun fəaliyyət istiqamətləri, fitosanitar nəzarət tədbirləri, idxal-ixrac zamanı bitki və bitkiçilik məhsullarının yoxlanması, zərərvericilərin təyin edilməsi metodu, aparılan analizlərin növləri, eləcə də təhlükəsizlik və keyfiyyət göstəricilərinin təyin olunmasının mümkünlüyü barədə məlumat verib. Tərəflər sözügedən təcrübənin birgə istifadə olunması barədə fikir mübadiləsi aparıblar.
Oxşar xəbərlər
Quş qripi xəstəliyi ilə bağlı tətbiq edilmiş bəzi məhdudiyyətlər aradan qaldırılıb
Ümumdünya Heyvan Sağlamlığı Təşkilatının (ÜHST) rəsmi məlumatlarına əsasən, İsrail Dövlətinin Cənub bölgəsində və Rumıniyanın Olt inzibati ərazi vahidində qeydə alınmış yüksək patogen quş qripi xəstəliyi aradan qaldırılıb. Belə ki, qeyd olunan ərazilərdə ÜHST-nin “Quruda yaşayan heyvanların sağlamlıq Məcəlləsi”nə əsasən, xəstəliyin ləğv edilməsindən sonra gözləmə müddəti başa çatıb və epizootik sağlamlıq statusu bərpa olunub. Bununla əlaqədar respublika ərazisinin bu yoluxucu xəstəlikdən qorunması məqsədilə Qida Təhlükəsizliyi Agentliyi tərəfindən həmin ərazilərə tətbiq edilmiş məhdudiyyətlər aradan qaldırılıb. Eyni zamanda müvafiq tədbirlərin görülməsi üçün Dövlət Gömrük Komitəsinə müraciət olunub.
Azərbaycan nüfuzlu beynəlxalq təşkilatın idarəetməsində təmsil olunacaq
Ümumdünya Heyvan Sağlamlığı Təşkilatının (ÜHST) 92-ci Baş Sessiyası çərçivəsində təşkilatın Avropa Regional Komissiyasının idarə heyətinə seçkilər keçirilib. Səsvermə nəticəsində Azərbaycan təmsilçisi ÜHST-nin Avropa Komissiyasına vitse-prezident seçilib. Bununla da ölkəmiz nüfuzlu təşkilatın idarəçiliyində təmsil olunacaq. 53 ölkənin daxil olduğu regionda tətbiq edilən bir sıra tədbirlər AQTA-nın Heyvan sağlamlığı və bioloji təhlükəsizlik şöbəsinin müdiri, Respublikanın Baş dövlət baytarlıq müfəttişi Qalib Əbdüləliyevin koordinasiyası ilə icra olunacaq. Eyni zamanda beynəlxalq təşkilatın gələcək fəaliyyət strategiyalarının və proqnozlarının hazırlanması Azərbaycan təmsilçisinin iştirakı ilə həyata keçiriləcək. Namizədliyi yekdil səslə qəbul olunan qərar nəticəsində Azərbaycanın digər ölkələr ilə ikitərəfli əməkdaşlığın qurulması potensialının yüksələcəyi, ölkəmizdə əldə edilmiş qabaqcıl təcrübənin digər ölkələrdə tətbiq olunmasına şərait yaranacağı gözlənilir.
Mərkəzi Baytarlıq Laboratoriyasında biokimyəvi və hematoloji analizlər yüksək dəqiqliklə aparılır
Heyvanlarda qan testlərinin aparılması xəstəliklərin diaqnozu üçün ən vacib üsullardan biridir. Artıq Azərbaycan Qida Təhlükəsizliyi İnstitutunun Mərkəzi Baytarlıq Laboratoriyasında hematoloji və biokimyəvi qan analizlərinin aparılması mümkündür. Hematoloji testlər vasitəsi ilə qanda hemoqlobinin səviyyəsini, həmçinin qırmızı qan hüceyrələrinin, leykositlərin, trombositlərin sayını təyin etmək mümkündür. Biokimyəvi qan testləri isə heyvanın daxili orqanlarının vəziyyətini qiymətləndirməyə və nəzarətdə saxlamağa imkan verir. Testlərin təyin edilməsində analizatorlardan istifadə olunması nəticələrin qısa müddət ərzində açıqlanmasına kömək edəcək. Qan testləri heyvan xəstəliklərinin başlanğıc mərhələdə aşkar edilməsi, baytar həkimlər tərəfindən müalicənin daha təsirli və sürətli aparılması üçün vacibdir.
