Giriş
AQTA meyvə-tərəvəz məhsullarının istehsalı və ixracatı ilə məşğul olan sahibkarlar üçün onlayn iclas keçirib
13 İyul 2020 17:01
Azərbaycan Respublikasının Qida Təhlükəsizliyi Agentliyi (AQTA) respublika ərazisində meyvə-tərəvəz məhsullarının istehsalı və ixracatı ilə məşğul olan fiziki və hüquqi şəxslər üçün onlayn iclas keçirib. İclasda 60-dan çox istehsalçı və ixracatçı ilə yanaşı Kənd Təsərrüfatı Nazirliyi yanında Aqrar Xidmətlər Agentliyinin rəhbəri Seymur Mövlayev və Azərbaycan Meyvə-Tərəvəz İstehsalçıları və İxracatçıları Assosasiyasının sədri Bəşir Quliyev də iştirak edib.
Agentliyin Bitki sağlamlığı şöbəsinin müdiri, respublikanın baş dövlət fitosanitar müfəttişi Xəyalə Dadaşova iştirakçılara ölkənin fitosanitar vəziyyəti, istehsal və ixrac olunan məhsullar, istixanalarda becərilən tərəvəzlər, ölkələrin ixrac olunan məhsullara fitosanitar tələbləri, zərərli orqanizmlərə qarşı elmi əsaslara söykənən məhvedici tədbirlər, fitosanitar sertifikatların verilməsi qaydaları barədə məlumat verib. Ölkənin fitosanitar vəziyyətinin sabit saxlanılmasında, eləcə də imicinin qorunmasında sahibkarların rol oynadığını qeyd edib. Artıq istixanalarda mövsümi olaraq məhsul yığımının başa çatdığı, sağlamlaşdırıcı tədbirlər üçün şərait yarandığı və hər bir sahibkar tərəfindən bu kimi məsələlərə diqqətlə və məsuliyyətlə yanaşılmasının vacibliyi vurğulanıb.
Sahibkarlara verilən dəstək və təlimatlar əsasında işlər daha səmərəli qurdulduğundan istehsal və ixracda yüksək nəticələrin əldə olunduğu diqqətə çatdırılıb. Digər ölkələrdən müasir cihaz və avadanlıqların alınaraq ölkəyə gətirildiyi, yüksək keyfiyyətli preparatlarla xidmətlərin həyata keçirildiyi, bu sahədə baş verən yeniliklərə dair bilik və bacarıqlarının artırılması məqsədilə mütəxəssislərin ötən il bir sıra ölkələrə ezam olunduğu barədə məlumat verilib. Hazırda istehsal və saxlanma sahələri, dənli və paxlalı bitkilərlə yanaşı, yaş meyvə tərəvəz məhsullarının zərərli orqanizmlərinin zərərsizləşdirilməsində də nailiyyətlər əldə olunduğu diqqətə çatdırılıb.
Sonra müzakirələr aparılıb və təkliflər dinlənilib.
Oxşar xəbərlər
Qəhvəyi mərmər bağacığı ilə bağlı mübarizə tədbirləri davam edir
Qəhvəyi mərmər bağacığına qarşı Regional Əlaqələndirmə Mərkəzinin Balakən və Xaçmaz rayonlarında növbəti müşavirəsi keçirilib. Görüşdə Qida Təhlükəsizliyi Agentliyinin, Kənd Təsərrüfatı Nazirliyi yanında Aqrar Xidmətlər Agentliyinin, Ekologiya və Təbii Sərvətlər Nazirliyi yanında Meşələrin İnkişafı Xidmətinin və Biomüxtəlifliyin Qorunması Xidmətinin, “Azərbaycan Dəmir Yolları” QSC-nin, Dövlət Gömrük Komitəsinin, yerli icra hakimiyyəti orqanlarının, eləcə də digər aidiyyəti qurumların məsul şəxsləri və əməkdaşları iştirak ediblər. Görüş zamanı zərərverici ilə mübarizə sahəsində həyata keçirilən tədbirlər, aparılan monitorinqlərin nəticələri və qarşıda duran vəzifələr barədə ətraflı məlumat verilib, maarifləndirici çap materialları paylanıb. Tədbirdə əvvəlki illərdə aparılmış təhlillər əsasında mövcud vəziyyət dəyərləndirilərək, iqtisadi rayonların ərazilərində, xüsusilə kütləvi aşkarlanma qeydə alınan kəndlərdə mövsümlə əlaqədar qışlama yerlərində monitorinqlərin intensivləşdirilməsi, maarifləndirmə işlərinin genişləndirilməsi və digər zəruri fitosanitar tədbirlərin görülməsi barədə qərar verilib. Həyətlərdə, evlərdə, köməkçi tikililərdə aidiyyəti qurumların əməkdaşları tərəfindən monitorinqlərin və mübarizə tədbirlərinin aparılması üçün sakinlərin şərait yaratması və özlərinin də bu tədbirlərdə yaxından iştirakının təmin edilməsi məqsədəuyğun hesab edilib.
İdxal olunan nektarin tinglərində uyğunsuzluq aşkarlandı
Nəzarət tədbirləri çərçivəsində “Agro Plant” MMC-nin Türkiyədən idxal etdiyi nektarin tinglərindən Agentliyin əməkdaşları tərəfindən nümunələr götürülərək müayinələrə cəlb olunub. Analiz nəticəsində 38000 ədəd tingdə şarka virusu aşkarlanıb.
Zərərli orqanizm aşkarlanan tinglər mexaniki üsulla təmizlənib
Nəzarət tədbirləri çərçivəsində “Frutti Agro” MMC-nin Türkiyədən idxal etdiyi nektarin tinglərindən Agentliyin müfəttişləri tərəfindən götürülmüş nümunələrin müayinəsi nəticəsində məhsul partiyasında karantin tətbiq edilən zərərverici −Tut qalxanlı yastıcası aşkarlanıb. Zərərli orqanizm aşkarlanmış 11000 ədəd nektarin tingi fitosanitar müfəttişlərin nəzarəti altında mexaniki üsulla təmizlənib, əkin sahəsi nəzarətə götürülüb.
