Giriş
AQTA nümayəndəsi İsveçrədə keçirilən beynəlxalq tədbirdə məruzə ilə çıxış edib
16 Oktyabr 2019 16:53
Azərbaycan Respublikasının Qida Təhlükəsizliyi Agentliyinin (AQTA) əməkdaşı İsveçrənin Cenevrə şəhərində keçirilən “Qeyri-Tarif tədbirləri həftəsi” sessiyasında iştirak edib. Sessiyada təqdimatla çıxış edən Agentliyin Qida təhlükəsizliyinin tənzimlənməsi və istehlakçıların hüquqlarının müdafiəsi sektorunun müdiri Fərid Əmirov ölkəmizdə qida təhlükəsizliyi sahəsində görülən işlərlə bağlı tədbirdə iştirak edən xarici dövlət və özəl sektor nümayəndələrinə ətraflı məlumat verib.
Beynəlxalq standartların yerli standartlara uyğunlaşdırılması mövzusunda keçirilən panel iclasda Agentliyin nümayəndəsi ölkəmizdə texniki tənzimləyicilərin beynəlxalq tələblərə uyğunlaşdırılması mövzusunda çıxış edib. Avropa Birliyinin tənzimləyici sənədlərinə uyğunlaşdırma, Kodeks Alimentarius Milli Komissiyasının, eləcə də komissiyanın tərkibində alt komitələrinin yaradılması, işçi qrupların formalaşdırılması barədə məlumat verilib. Diqqətə çatdırılıb ki, artıq texniki tənzimləyici sənədlər İşçi Qrupda hazırlanma mərhələsindədir. Bu sahədə beynəlxalq təşkilatlarla sıx əməkdaşlıq davam etdirilir.
Qeyd edək ki, sessiyalar zamanı qeyri-tarif tədbirləri və ticarət münasibətləri, elektron ticarət, milli və regional tənzimləmənin uyğunluğu, əməkdaşlıq ilə bağlı siyasi təşəbbüslər, qeyri-tarif ticarət münasibətləri, beynəlxalq standartların tətbiqi üzrə orqanlar, Asiya ve Sakit Okean hövzələrində qeyri-tarif və Dayanıqlı İnkişaf Məqsədləri üzrə əlaqələrin qurulması, balıqçılıq subsidiyalarında şəffaflığın təmin olunması mövzularında müzakirələr aparılıb.
Oxşar xəbərlər
Qurban bayramı ilə bağlı hazırlıq işləri davam edir
6-7 iyun tarixlərində qeyd olunacaq Qurban bayramı günlərində daha çox heyvanın kəsimi və satışının həyata keçirildiyini nəzərə alaraq, Qida Təhlükəsizliyi Agentliyi aidiyyəti dövlət orqanları ilə birgə əhalinin təhlükəsiz ət və ət məhsulları ilə təmin edilməsi istiqamətində aparılan tədbirlərin miqyasını genişləndirib.
Təhlükəli zoonoz xəstəlik — Qarayara
Qarayara — heyvanlardan insanlara keçə bilən zoonoz xəstəliklərdəndir. Hazırda bütün dünyada insanlar arasında rast gəlinən yoluxucu xəstəliklərin 60%-dən çoxu məhz zoonoz infeksiyaların payına düşür. Heyvanlar bu infeksiyaya xəstəlik törədiciləri ilə çirklənmiş su və torpaq vasitəsi ilə yoluxur. Xəstəliyin əsas əlamətləri isə bunlardır: heyvan qəfil yıxılır, ağız və burun dəliklərindən qanlı köpük, anus dəliyindən isə qan axır, bir neçə dəqiqə ərzində ölüm halı baş verir. Qanda laxtalanma prosesi getmədiyindən, cəsəd qısa müddətdə köpür və bərkimir. Qarayara xəstəliyindən tələf olmuş heyvanların cəsədinin yarılması yolverilməzdir. Ölmüş heyvanın cəsədi yandırılma yolu ilə zərərsizləşdirilməlidir. İnsanlar xəstə heyvanların əti, ondan hazırlanmış yarımfabrikat məhsulların istehlakı və digər ətraf mühit amilləri ilə bu xəstəliyə yoluxa bilər. Bu zaman yoluxmuş şəxs dərhal tibbi yardım almalıdır. Mal-qaranı qarayara xəstəliyindən qorumaq üçün heyvanların dövri peyvəndlənməyə cəlb olunması vacibdir. Xəstəlikdən qorunmağın ən təsirli yolu baytarlıq nəzarəti olmayan yerdən ət almamaqdır.
Dünyadakı epizootik vəziyyətə uyğun olaraq müvafiq tədbirlər görülür
Ümumdünya Heyvan Sağlamlığı Təşkilatının (ÜHST) rəsmi məlumatlarına əsasən, Xorvatiya Respublikasının Brodsko-Posavska inzibati ərazi vahidində, Danimarka Krallığının Şimali Yutlandiya regionunda, Türkiyə Respublikasının Kayseri vilayətində yüksək patogen quş qripi xəstəliyi qeydə alınıb. Respublika ərazisinin bu yoluxucu xəstəlikdən qorunması üçün qeyd olunan ərazilərdə zonalaşma prinsipi nəzərə alınmaqla, xəstəlik baş vermiş təsərrüfatdan 10 km radiusda olan məsafədə yerləşən müəssisələrdən diri quş və quşçuluq məhsullarının idxalına ÜHST-nin “Quruda yaşayan heyvanların sağlamlıq Məcəlləsi”nə uyğun olaraq müvəqqəti məhdudiyyət tətbiq olunub. Eyni zamanda müvafiq tədbirlərin görülməsi üçün Azərbaycan Respublikasının Dövlət Gömrük Komitəsinə müraciət olunub.
