Giriş
AQTA sədri Moskvada “Rosselxoznadzor”un rəhbəri Sergey Dankvertlə görüşüb
7 Oktyabr 2023 09:40
Azərbaycan Respublikası Qida Təhlükəsizliyi Agentliyinin (AQTA) sədri Qoşqar Təhməzlinin rəhbərlik etdiyi nümayəndə heyətinin Rusiya Federasiyasına səfəri çərçivəsində oktyabrın 6-da bu ölkənin Baytarlıq və Fitosanitar Nəzarəti üzrə Federal Xidmətinin (“Rosselxoznadzor”) rəhbəri Sergey Dankvertlə görüşü keçirilib.
Görüşdə Rusiya Federasiyasından ölkəmizə yüksək riskli qida məhsulları idxal edilən müəssisələrin qeydiyyatı və təsdiqi ilə bağlı məsələlər nəzərdən keçirilib. Prosesin uğurla aparıldığı və bu vaxtadək qeydiyyatdan keçməyən müəssisələrdən məhsul idxalına icazə müddətinin 2023-cü il 31 dekabr tarixinədək uzadıldığı vurğulanıb. Eyni zamanda görüşdə Rusiya Federasiyasının təsdiq sisteminin ekvivalentliyi, Azərbaycan Respublikasından bu ölkəyə ixrac olunan heyvan mənşəli məhsulların keyfiyyət və təhlükəsizliyinə dair nəzarətin daha da sadələşdirilməsi və iki ölkə arasındakı dövlət sərhəd-keçid məntəqələrində baytarlıq nəzarətinin gücləndirilməsi və sərhədyanı bölgələrdə baytarlıq tədbirlərinin təşkilinə dair birgə görüşlərin keçirilməsi müzakirə edilib, təkliflər irəli sürülüb. Görüşdə transsərhəd heyvan xəstəliklərinə qarşı tədbirlərin bir-birilə əlaqəli şəkildə həyata keçirilməsi, vəhşi heyvanların quduzluğa qarşı peyvəndlənməsinin sərhədin hər iki tərəfində eyni vaxtda aparılması, heyvanların identifikasiyası üzrə əməkdaşlıq, heyvan mənşəli məhsulların ixracına nəzarət mexanizmlərinin təkmilləşdirilməsi və s. məsələlər müzakirə olunub.
Görüşdə həmçinin iki ölkə arasında fitosanitar sahədə idxal-ixrac nəzarətinin daha da təkmilləşdirilməsi məqsədilə informasiya sistemlərinin inteqrasiyası prosesinin sürətləndirilməsindən bəhs edilib. Bir sıra kənd təsərrüfatı məhsullarının (pomidor, tumlu çəyirdəkli meyvələr) ixracı zamanı Agentliyin zəmanəti əsasında məhsul partiyalarının laborator müayinələrə cəlb edilməsi tezliyinin azaldılması üçün zəruri prosedurların razılaşdırılması qərara alınıb. Söhbət zamanı qarşılıqlı maraq doğuran digər məsələlərlə bağlı da fikir mübadiləsi aparılıb.
Səfər çərçivəsində Q.Təhməzli Rusiya Federasiyasının Hökumət rəhbəri Mixail Mişustin və digər dövlət rəsmilərinin iştirakı ilə keçirilən “Qızıl payız-2023” aqrar-sənaye sərgisinin rəsmi açılış mərasimində iştirak edib. Daha sonra AQTA nümayəndə heyətinin “Gələcəyə investisiya: kənd təsərrüfatı təhsilinə müasir baxış” mövzusunda keçirilən plenar iclasda iştirakı baş tutub. Həmçinin Agentliyin nümayəndə heyətinin üzvləri Rusiyanın “Taxıl Keyfiyyətinin Qiymətləndirilməsi Mərkəzi" Federal Dövlət Büdcə Müəssisəsinə baş çəkib, mərkəzin nəzdində fəaliyyət göstərən laboratoriyada taxıl məhsullarının keyfiyyət və təhlükəsizlik göstəricilərinin müəyyən edilməsinə dair təcrübə ilə tanış olublar.
Qeyd edək ki, Agentlik əməkdaşları “Pestisidlərin və Aqrokimyəvi Maddələrin İzlənməsi üzrə Federal Dövlət İnformasiya Sistemi” mövzusunda keçirilən dəyirmi masada da iştirak ediblər. Nümayəndə heyəti Heyvanların Ümumrusiya Mühafizə Mərkəzi, Ümumrusiya Dövlət Heyvanlar üçün Dərman Vasitələri və Yemlərin Standartlaşdırılması və Keyfiyyət Mərkəzi və Ümumrusiya Bitki Karantini Mərkəzindən olan həmkarları ilə də görüşüb, Ümumrusiya Bitki Karantini Mərkəzinin fəaliyyəti və yeni feromon tələlərin istehsalı, elmi-metodiki mərkəzin və bioloji üsulla mübarizə şöbələrinin fəaliyyəti ilə yaxından tanış olub.
AQTA sədrinin rəhbərlik etdiyi nümayəndə heyətinin Rusiya Federasiyasına səfəri bu gün başa çatır.
Oxşar xəbərlər
Yardımlıda ticarət obyektində istehlaka yararsız məhsulların satışının qarşısı alınıb
Yardımlı şəhəri, H.Əliyev küçəsi 245 ünvanında fəaliyyət göstərən, fiziki şəxs Quluzadə Murad Möhübbət oğluna məxsus ticarət obyektində Qida Təhlükəsizliyi Agentliyinin əməkdaşları tərəfindən keçirilmiş yoxlama zamanı normativ tələblərin pozulduğu məlum olub. Belə ki, ticarət obyektində istifadə müddəti bitmiş ümumi həcmi 47,16 litr olan müxtəlif əmtəə nişanlı alkoqollu və alkoqolsuz içkilərin, ümumi çəkisi 2,34 kq olan ət konservinin satışa çıxarıldığı aşkarlanıb. Eyni zamanda qida məhsullarının saxlanma qaydalarına və temperatur rejiminə əməl olunmadığı, işçinin tibbi müayinədən keçmədiyi və xüsusi geyimlə təmin edilmədiyi, havalandırma sisteminin quraşdırılmadığı və digər nöqsanlar müəyyən edilib. Faktla bağlı qanunvericiliyin tələblərinə uyğun müvafiq tədbirlər görülərək sahibkar barəsində inzibati protokol tərtib edilib, istehlaka yararsız məhsullar məhv edilib.
“Ulduz-reytinq” layihəsi çərçivəsində müraciətlərin sayı 100-ü keçib
Azərbaycan Qida Təhlükəsizliyi İnstitutu (AQTİ) qida sahəsində fəaliyyət göstərən ictimai iaşə obyektlərinin risk göstəricilərinə əsasən reytinqini müəyyənləşdirməyə davam edir. Həyata keçirilən qiymətləndirmə həm ictimai iaşə obyektləri üçün keyfiyyət göstəricisi sayılır, həm də müştərilər üçün daha etibarlı seçim şansı yaradır. “Ulduz-reytinq” layihəsi çərçivəsində restoranların reytinqi müvafiq olaraq 3, 4 və 5 ulduzla qiymətləndirilir. İndiyə qədər Bakı və regionlar daxil olmaqla sahibkarlar tərəfindən AQTİ-yə 101 müraciət daxil olub, onlardan 32 müəssisə müxtəlif reytinq təsnifatları ilə qiymətləndirilib. Digər müraciətlərin qiymətləndirilməsi prosesi isə davam edir. Məlumat üçün qeyd edək ki, Bakı, Gəncə, Lənkəran bölgələri üzrə "Ulduz-reytinq" sertifikatı ilə qiymətləndirilən ictimai iaşə obyektləri üstünlük təşkil edir. Qeyd edək ki, proses sahibkarların könüllü müraciətinə əsasən həyata keçirilir. Bunun üçün sahibkarlar info@afsi.gov.az elektron poçtu vasitəsilə AQTİ-yə rəsmi müraciət etməlidirlər. Müraciət İnstituta daxil olduqdan sonra 30 gün müddətində ictimai iaşə obyektində yoxlama aparılır. 10 iş günü müddətində isə sahibkarlara nəticələr haqqında rəsmi bildiriş göndərilir. Nəticələrə uyğun olaraq ictimai iaşə obyektlərinə 1 il müddətinə müvafiq sertifikat verilir.
Qoşqar Təhməzli qida sahəsində fəaliyyət göstərən sahibkarları qəbul edəcək
Qida Təhlükəsizliyi Agentliyinin sədri Qoşqar Təhməzlinin növbəti vətəndaş qəbulu Agentliyin inzibati binasında mayın 1-i saat 14:00-da keçiriləcək. Qida zəncirinin bütün mərhələlərində fəaliyyət göstərən sahibkarlar, o cümlədən qida məhsullarının istehsalı, emalı, idxal-ixracı, daşınması, satışı və sair sahələrdə çalışan şəxslər onları narahat edən məsələlərlə bağlı Agentlik sədri ilə görüşə bilərlər. Görüşdə iştirak etmək istəyən şəxslər ad, soyad, fəaliyyət sahəsi, müraciətin məzmunu və telefon nömrələrini göstərərək info@afsa.gov.az elektron poçtu vasitəsilə müraciət etməklə və ya (+994 50) 515 51 87 nömrəsinə zəng etməklə, həmçinin vatsap üzərindən əlaqə saxlamaqla qəbula yazıla bilərlər.
