Giriş
AQTİ-də Təlim Mərkəzi fəaliyyətə başlayır
10 Fevral 2021 13:17
Qida təhlükəsizliyi sahəsində elmi bazanın təkmilləşdirilməsi və kadr potensialının gücləndirilməsi, bu istiqamətdə mütəmadi qaydada təlimlərin təşkil edilməsi məqsədilə Azərbaycan Qida Təhlükəsizliyi İnstitutunun (AQTİ) Qida Təhlükəsizliyi Təlim Mərkəzi fəaliyyətə başlayır. İlkin mərhələdə Təlim Mərkəzinin konsepsiyası və xüsusi tərtibatda kataloqu, eyni zamanda mərkəzin səmərəli fəaliyyəti ilə bağlı əsas təlim metodları və ilkin qeydiyyatı ilə bağlı xüsusi formalar hazırlanıb.
Təlimlərin daha səmərəli və keyfiyyətli təşkili üçün AQTA və AQTİ mütəxəssisləri və beynəlxalq təlimçilərin siyahısı müəyyən edilib, təyin edilmiş meyarlar üzrə təlimçilərin təsnifatlaşdırılması aparılıb və daim yenilənən təlimçi bazası yaradılıb. Eyni zamanda, qida təhlükəsizliyi, heyvan və bitki sağlamlığı istiqamətləri ilə bağlı peşə kvalifikasiyaları üzrə sertifikatlaşdırma mexanizmi yaradılıb, bu sahələr üzrə xüsusi təlim modulları və onların alt modulları hazırlanıb.
Bundan başqa, ali təhsil müəssisələri ilə müvafiq ixtisas sahələri üzrə birgə əməkdaşlıq əlaqələrinin genişləndirilməsi istiqamətində müvafiq tədbirlər həyata keçirilməkdədir. İlkin mərhələdə Azərbaycan Qida Təhlükəsizliyi İnstitutu ilə Azərbaycan Dövlət Neft və Sənaye Universiteti arasında elm, təhsil və tədqiqat üzrə əməkdaşlıq haqqında memorandum imzalanıb.
Gələcəkdə Qida Təhlükəsizliyi Təlim Mərkəzində “Onlayn məsləhət”, “Məsafədən təlim”, “Təlimlərə və tədbirlərə onlayn qeydiyyat” panellərindən ibarət elektron xidmətlər platformasının yaradılması nəzərdə tutulur.
Oxşar xəbərlər
Siyəzəndə ərzaq bazarında yoxlama keçirilib
Azərbaycan Respublikası Qida Təhlükəsizliyi Agentliyinin əməkdaşları Siyəzən şəhəri, Xətai küçəsi 56 ünvanında fəaliyyət göstərən, “Xətai” Ticarət Mərkəzinə məxsus ərzaq bazarında plandankənar yoxlama keçirib. Yoxlama zamanı bazarda qida təhlükəsizliyi sahəsində texniki normativ hüquqi aktların tələblərinin pozulduğu aşkarlanıb. Aşkar edilmiş nöqsanların aradan qaldırılması ilə bağlı icrası məcburi göstərişlər verilib, sahibkar barəsində inzibati protokol tərtib edilib.
Beyləqanda məktəblilərin zəhərlənməsi faktı AQTA-nın nəzarətindədir
Azərbaycan Respublikasının Qida Təhlükəsizliyi Agentliyi (AQTA) Beyləqan rayonunun Eyvazalılar kənd tam orta ümumtəhsil məktəbində şagirdlərin zəhərlənməsi faktını dərhal nəzarətə götürüb və araşdırmalara başlayıb.
AQTA sədri Belarusun Kənd Təsərrüfatı və Ərzaq Nazirinin müavini ilə görüşüb
Azərbaycan Respublikasının Qida Təhlükəsizliyi Agentliyinin (AQTA) sədri Qoşqar Təhməzli Belarus Respublikasının Kənd Təsərrüfatı və Ərzaq Nazirinin müavini, Baytarlıq və Ərzaq Nəzarəti Departamentinin direktoru İvan Smilgin ilə görüşüb. Görüşdə Azərbaycan-Belarus arasında qida təhlükəsizliyi və baytarlıq sahələrində əməkdaşlığın mövcud vəziyyəti və inkişaf perspektivləri, qida təhlükəsizliyi sistemlərinin ekvivalentliyinin tanınması, baytarlıq preparatlarının birgə istehsalı və heyvanların identifikasiyası məsələləri müzakirə olunub.
