Giriş
AQTİ işə qəbul elan edir
17 May 2024 10:43
Azərbaycan Qida Təhlükəsizliyi İnstitutu (AQTİ) keyfiyyətə nəzarət üzrə mütəxəssis və böyük mütəxəssis vəzifələrinə peşəkar kadrları işə dəvət edir.
İşə qəbul üçün kimya mühəndisliyi, biologiya, qida təhlükəsizliyi, bitki və heyvan sağlamlığı, sertifikatlaşdırma və standartlaşdırma və digər oxşar ixtisaslar üzrə ali təhsilli şəxslər müraciət edə bilərlər. Eyni zamanda onların müvafiq sahə üzrə ən azı 3 il iş təcrübəsi, həmçinin ünsiyyət qurma, kompüterdən istifadə (Microsoft Office), “ISO 17025:2017 Sınaq və kalibrləmə laboratoriyalarının səriştəliliyinə dair tələblər”i və “ISO 9001:2015 Keyfiyyəti idarəetmə sistemləri. Tələblər”i tətbiqetmə bacarıqları olmalıdır. İşə qəbul üçün müraciət edənlərdən Azərbaycan dili ilə yanaşı, ingilis dilini bilənlərə, eləcə də “ISO 22000:2018 Qida təhlükəsizliyi idarəetmə sistemləri - Qida zəncirindəki bütün təşkilatlara tələblər”, “ISO 17065:2012 Uyğunluğun qiymətləndirilməsi. Məhsulların, proseslərin və xidmətlərin sertifikatlaşdırılmasını aparan orqanlara dair tələblər”, “ISO 17021-1:2015 Uyğunluğun qiymətləndirilməsi. İdarəetmə sistemlərinin auditi və sertifikatlaşdırmasını təmin edən təşkilatlara dair tələblər”, “ISO 17020:2012 Uyğunluğun qiymətləndirilməsi. İnspeksiya həyata keçirənn müxtəlif növ orqanların fəaliyyətinə dair tələblər” standartlarının tətbiqində iştirak etmiş namizədlərə üstünlük veriləcək.
Göstərilən tələblərə cavab verən şəxslər anket formalarını (CV) 31.05.2024-cü il tarixədək mövzu yerinə “Keyfiyyətə nəzarət üzrə mütəxəssis” yazaraq hr.aqti@afsa.gov.az elektron poçt ünvanına göndərə bilərlər.
İşə qəbul müsahibə əsasında aparılacaq. Yalnız müvafiq tələblərə cavab verən namizədlərin CV-ləri təhlil ediləcək və onlar müsahibəyə dəvət olunacaqlar.
Oxşar xəbərlər
Qoşqar Təhməzli qida sahəsində fəaliyyət göstərən sahibkarları qəbul edəcək
Qida Təhlükəsizliyi Agentliyinin sədri Qoşqar Təhməzlinin növbəti vətəndaş qəbulu Agentliyin inzibati binasında mayın 1-i saat 14:00-da keçiriləcək. Qida zəncirinin bütün mərhələlərində fəaliyyət göstərən sahibkarlar, o cümlədən qida məhsullarının istehsalı, emalı, idxal-ixracı, daşınması, satışı və sair sahələrdə çalışan şəxslər onları narahat edən məsələlərlə bağlı Agentlik sədri ilə görüşə bilərlər. Görüşdə iştirak etmək istəyən şəxslər ad, soyad, fəaliyyət sahəsi, müraciətin məzmunu və telefon nömrələrini göstərərək info@afsa.gov.az elektron poçtu vasitəsilə müraciət etməklə və ya (+994 50) 515 51 87 nömrəsinə zəng etməklə, həmçinin vatsap üzərindən əlaqə saxlamaqla qəbula yazıla bilərlər.
Qoşqar Təhməzli Ağsuda vətəndaşları qəbul edib
Qida Təhlükəsizliyi Agentliyinin sədri Qoşqar Təhməzli aprelin 25-i Ağsuda Ağsu, İsmayıllı, Qobustan, Şamaxı rayonlarından olan vətəndaşları qəbul edib. Qəbuldan öncə Ümummilli Lider Heydər Əliyevin abidəsi ziyarət edilib, önünə gül dəstələri düzülüb, xatirəsi ehtiramla yad edilib. Qəbulda vətəndaşların müraciətləri diqqətlə dinlənilib, bir qismi yerində öz həllini tapıb, qaldırılan bəzi məsələlər araşdırılması üçün nəzarətə götürülüb. Qida sahəsində işlə təmin olunmaq istəyən müvafiq ixtisaslara yiyələnmiş vətəndaşların müraciətlərinə də baxılıb. Agentliyin fəaliyyət dairəsinə aid olmayan müraciətlər isə müvafiq qurumlara çatdırılmaq üçün qeydiyyata alınıb.
Göygöldə "Dost" kafesində normativ tələblərin pozulduğu müəyyən edilib
Qida Təhlükəsizliyi Agentliyinin əməkdaşları Göygöl rayonu, Balçılı kəndində fəaliyyət göstərən “Dost” kafesində yoxlama keçirib. Baxış zamanı ictimai iaşə obyektində sanitar-texniki və sanitar-gigiyenik vəziyyətin normativ tələblərə cavab vermədiyi, soyuducuda mal qonşuluğu prinsipinin pozulduğu və etiketlənməsi aparılmayan qida məhsulları aşkarlanıb. Emal sahəsində ayrıca yuma çanaqlarının təşkil edilmədiyi, havalandırma sisteminin təchiz edilmədiyi, döşəmə və divar səthlərinin təmirsiz olduğu, qida ilə təmasda olan işçilərin tibbi müayinədən keçmədiyi və gigiyenik təlimlərə cəlb olunmadığı, müvafiq təmizlik işlərinin görülmədiyi və digər nöqsanlar aşkarlanıb. Faktla bağlı sahibkar barəsində inzibati protokol tərtib edilib, nöqsanlar aradan qaldırılanadək iaşə obyektinin dönər hazırlanma sahəsində işlərin və xidmətlərin görülməsinə məhdudiyyət tətbiq olunub və icrası məcburi göstərişlər verilib.
