Giriş
FAO-nun AQTA-ya institusional islahat və idarəetməyə texniki dəstək layihəsi çərçivəsində yekun seminar keçirilib
26 Noyabr 2020 17:56
Noyabrın 25-də BMT-nin Ərzaq və Kənd Təsərrüfatı Təşkilatı (FAO) və Azərbaycan Respublikası Qida Təhlükəsizliyi Agentliyinin birgə həyata keçirdiyi “Agentlikdə institusional islahatlar və idarəetmənin təkmilləşdirilməsinə dair texniki dəstək” layihəsi çərçivəsində - nailiyyətlər və gələcək əməkdaşlıqlar mövzusu üzrə yekun görüş keçirilib.
Onlayn formatda keçirilən seminarda 2019-2020-ci illər ərzində AQTA-ya institusional islahat və idarəetməyə texniki dəstək layihəsi üzrə əldə olunan nailiyyətlər və irəliləyişlərdən bəhs olunub.
Tədbirin açılış mərasimində BMT-nin Ərzaq və Kənd Təsərrüfatı Təşkilatının Azərbaycandakı Tərəfdaşlıq və Əlaqələndirmə Ofisinin rəhbəri Mələk Çakmak və Azərbaycan Respublikası Qida Təhlükəsizliyi Agentliyinin sədr müşaviri Elxan Mikayılov çıxış ediblər. “Qida Təhlükəsizliyi yalnız insanların sağlamlığı üçün əhəmiyyətli deyil, həmçinin onların dolanışığının təmin olunması üzrə mühüm rola malikdir. Xüsusilə qeyd etmək istəyirəm ki, FAO-nun AQTA ilə əməkdaşlığı bu məcrada görülən işlərin əsasını təşkil edir və edəcəkdir”, - deyə Mələk Çakmak öz çıxışında bildirib. Daha sonra çıxış edən Elxan Mikayılov Agentliyin fəaliyyət istiqamətləri və qarşıya qoyulan məqsədlərdən, qida təhlükəsizliyi sahəsində həyata keçirilən islahatlar və Azərbaycan Respublikasında qida təhlükəsizliyinin təmin olunması mərhələlərindən danışıb. O bildirib ki, FAO ilə yeni qida təhlükəsizliyi sisteminin yaradılması məqsədilə uzun yol qət edilib və Agentlik institusional məsələlərdə FAO-nun təcrübəsindən yararlanır. Qeyd olunub ki, bu sahədə gələcək nailiyyətləri təmin etmək üçün risk əsaslı yanaşma prinsipi əsas götürülür ki, bu da ölkəmizdə qida təhlükəsizliyi sisteminin daha da təkmilləşdirilməsinə, yeni qida təhlükəsizliyi mexanizminin inkişafına təkan verir.
Daha sonra AQTA və FAO-nun layihə üzrə beynəlxalq mütəxəssislərinin təqdimatları baş tutdu. Görüşdə iştirakçılara qida nəzarət sistemlərində institusional islahatlar, “Codex alimentarius” üzrə milli potensialın inkişafı, qida təhlükəsizliyi və qida nəzarət sistemlərində irəliləyiş və prioritetlər və bu sahədə görülən zəruri tədbirlərə dair məlumatlar çatdırıldı.
Görüşdə gələcək əməkdaşlığın daha da genişləndirilməsini nəzərdə tutan qarşıdakı layihələr barədə müzakirələr baş tutub. Bununla əlaqədar, FAO-nun Qida təhlükəsizliyi və istehlakçı hüquqları müdafiəsi üzrə mütəxəssisi xanım Mary Kenny milli qida təhlükəsizliyi sistemlərinin və regional əməkdaşlığın təkmilləşdirilməsi barədə təqdimatla çıxış edib. Sonda Qida Təhlükəsizliyi Agentliyinin Beynəlxalq əlaqələr və protokol şöbəsinin müdiri Fuad Mardiyev qarşıdakı dövrdə planlaşdırılan “Dayanıqlı Milli Kodeks sisteminin yaradılması”na dair layihəni təqdim edib.
Seminar çərçivəsində Agentliyin kadr potensialının daha da gücləndirilməsi və laboratoriya imkanlarının təkmilləşdirilməsi istiqamətində həyata keçiriləcək layihələr barədə ətraflı fikir mübadiləsi aparılıb.
Oxşar xəbərlər
İdxal olunan baytarlıq preparatında uyğunsuzluq aşkarlanıb
Azərbaycan Respublikasının Qida Təhlükəsizliyi Agentliyi tərəfindən həyata keçirilən nəzarət tədbirləri zamanı "Spektra-Vet" MMC-nin respublikamıza idxal etdiyi baytarlıq preparatlarının sınaq nəticələrində uyğunsuzluq aşkarlanıb. Belə ki, Çin Xalq Respublikasından idxal edilən “Farmazin Tylo” əmtəə nişanlı baytarlıq preparatı məhsul partiyasından götürülmüş nümunələrdə pH göstəricisinin normativ texniki tələblərə cavab vermədiyi müəyyən edilib. Uyğunsuzluqla əlaqədar qanunvericiliyə müvafiq qərar qəbul edilərək, 5010 ədəd 50 ml-lik, 3006 ədəd 100 ml-lik məhsul məhv edilib.
Fermer üçün yeni mərhələ: heyvanın identikləşdirilməsindən məhsulun izlənilməsinədək
Azərbaycan Respublikasında qida təhlükəsizliyinin təmin edilməsinə dair 2027–2032-ci illər üçün Dövlət Proqramı çərçivəsində heyvanların identikləşdirilməsi sisteminin təkmilləşdirilməsi və əhatə dairəsinin genişləndirilməsi nəzərdə tutulur. Dövlət Proqramının tədbirlər planının 8.5.3-cü bəndinə əsasən həyata keçiriləcək tədbirlər ilk növbədə heyvan sahiblərinin təsərrüfatlarında heyvanların uçotunun və hərəkətinin daha dəqiq izlənilməsinə imkan yaradacaq. Bu isə fermer üçün təsərrüfatındakı heyvanlarla bağlı məlumatların daha sistemli şəkildə aparılması deməkdir. Heyvanın identikləşdirilməsi onun hansı təsərrüfata məxsus olduğunu, hərəkətini və baytarlıq məlumatlarını izləməyə imkan verəcək. Nəticədə xəstəliklərin aşkarlandığı hallarda risk altında olan heyvanların və təsərrüfatların daha sürətli müəyyənləşdirilməsi, müvafiq baytarlıq tədbirlərinin vaxtında həyata keçirilməsi mümkün olacaq. Sistem fermer üçün heyvanların sağlamlıq vəziyyətinə nəzarətin gücləndirilməsinə də şərait yaradacaq. Xəstəliklərin yayılmasının qarşısının daha effektiv alınması təsərrüfatların qorunmasına, heyvan itkilərinin və bununla bağlı iqtisadi zərərlərin azaldılmasına xidmət edəcək. Heyvanların identikləşdirilməsi eyni zamanda heyvan mənşəli məhsulların izlənəbilənliyinin təmin olunmasında mühüm rol oynayacaq. Beləliklə, məhsulun hansı təsərrüfatdan əldə edildiyi barədə məlumatların müəyyənləşdirilməsi qida təhlükəsizliyi zəncirində nəzarətin gücləndirilməsinə imkan verəcək. Dövlət Proqramının icrası çərçivəsində heyvan sahiblərinin identikləşdirmə prosesi barədə məlumatlandırılması və bu istiqamətdə maarifləndirmə tədbirlərinin davam etdirilməsi də nəzərdə tutulur. Beləliklə, identikləşdirmə sistemi fermer üçün yalnız heyvanların qeydiyyata alınması deyil, həm də təsərrüfata nəzarətin gücləndirilməsi, heyvan sağlamlığının qorunması, risklərin vaxtında müəyyənləşdirilməsi və istehsal olunan məhsulların izlənəbilənliyinin təmin edilməsi baxımından əhəmiyyət daşıyır. Bu yanaşma fermer üçün heyvanın qeydiyyatından başlayaraq onun sağlamlıq vəziyyətinin izlənilməsinə, daha sonra isə heyvan mənşəli məhsulların hərəkətinin izlənilməsi imkanlarının genişləndirilməsinə şərait yaradacaq.
Heyvan bazarlarında yeni mərhələ: müasir infrastruktur və gücləndirilmiş baytarlıq nəzarəti
Ölkə üzrə heyvan bazarlarında ötən ildən başlanan yenidənqurma işlərinin əsas hissəsi artıq yekunlaşıb. Yenilənmiş bazarlarda müasir baytarlıq-sanitariya tələblərinin tətbiqi, heyvanların identifikasiyası və hərəkətinin izlənilməsi üçün zəruri infrastruktur yaradılıb. 1 il ərzində ümumilikdə ölkə üzrə 22 heyvan bazarı Azərbaycan Respublikası Qida Təhlükəsizliyi Agentliyinin (AQTA) Kollegiyasının Qərarı ilə təsdiq edilmiş “Heyvan bazarlarına dair baytarlıq-sanitariya norma və qaydaları”na uyğun yenidən qurularaq istifadəyə verilib. Yenidənqurma işləri zamanı əvvəlki bazarlarda mövcud olan baytarlıq-sanitariya və sanitar-gigiyenik tələblərə əməl olunması ilə bağlı çatışmazlıqların aradan qaldırılmasına xüsusi diqqət yetirilib. Bu istiqamətdə sahibkarlıq subyektləri ilə AQTA-nın birgə fəaliyyəti nəticəsində böyük bir layihə qısa zaman kəsiyində icra edilib. Müasir heyvan bazarlarında heyvanların baytar nəzarətində qəbulu, identifikasiyası və hərəkətinin izlənilməsi həyata keçirilir. Bu tədbirlər heyvan xəstəliklərinin vaxtında aşkarlanmasına, onların yayılma riskinin azaldılmasına və ümumi epizootoloji təhlükəsizliyin təmin edilməsinə imkan yaradır. Beləliklə, yenilənmiş və yeni inşa edilən heyvan bazarları yalnız alqı-satqı məkanı deyil, həmçinin heyvan sağlamlığının qorunması, baytarlıq nəzarətinin və sanitariya tələblərinin təmin edildiyi müasir infrastruktur kimi fəaliyyət göstərir. Daha ətraflı:
