Heyvan kəsimi məntəqələrində hansı tələblərə əməl olunmalıdır?

14 Avqust 2026 12:38

Heyvan mənşəli qida məhsullarının təhlükəsizliyinin təmin edilməsi üçün heyvan kəsimi yalnız baytarlıq-sanitariya və qida təhlükəsizliyi tələblərinə cavab verən kəsim məntəqələrində həyata keçirilməlidir.
Kəsim məntəqələrində istehsal prosesinin təhlükəsiz və gigiyenik şəkildə təşkili üçün “çirkli” və “təmiz” zonalar ayrılmalı, heyvanların kəsimdən əvvəl saxlanılması, kəsim, ətin emalı, qablaşdırılması və soyudulması üçün zəruri sahələrin olması vacibdir.
Kəsimdən əvvəl heyvanlar baytarlıq müayinəsindən keçirilməli, xəstəlik əlamətləri və ya xəstəlik şübhəsi olan heyvanların kəsiminə yol verilməməlidir. Kəsim prosesi zamanı sanitariya-gigiyena qaydalarına ciddi əməl olunmalı, istifadə edilən avadanlıq və iş alətləri mütəmadi olaraq təmizlənməli və dezinfeksiya edilməlidir.
Kəsimdən sonra əldə olunan ət baytarlıq-sanitariya ekspertizasından keçirilməli, istehlak üçün yararlı olduğu müəyyən edildikdən sonra müvafiq qaydada soyudulmalı, saxlanılmalı və daşınmalıdır. 
Qeyd olunan tələblərə əməl edilməsi heyvan mənşəli qida məhsullarının təhlükəsizliyinin təmin olunmasına, eləcə də istehlakçıların sağlamlığının qorunmasına xidmət edir.

Oxşar xəbərlər

13 Avqust 2026 16:05

AQTA, Səhiyyə Nazirliyi və TƏBİB-in birgə məlumatı

Samux rayonu üzrə qeydə alınan qarayara hadisəsi ilə bağlı ilkin epidemioloji araşdırmalara əsasən xəstəliyə şübhəli bilinən şəxslərin iribuynuzlu heyvanlarla təması müəyyən edilib. Xəstəliyə şübhəli olan ilk şəxsdən götürülmüş müayinə materialının laborator müayinəsi nəticəsində “qarayara xəstəliyi” diaqnozu təsdiq edilmişdir. Hazırda təmasda olan şəxslər müəyyənləşdirilmış, tibbi müşahidəyə cəlb edilmiş və hər hansı dəri yarası olan şəxslərdən laborator müayinələrin aparılması üçün nümunələr toplanılmışdır. Xəstə heyvanla təmasda olan 9 nəfər şəxs aşkarlanaraq Abbas Səhhət adına Gəncə Şəhər Birləşmiş Xəstəxanasının yoluxucu xəstəliklər şöbəsində izolyasiya edilmişdir. Xəstəliklə təmasda olan şəxslər əsasən Samux rayon sakinləridir. Sözügedən şəxslərdən laborator müayinə üçün nümunələr toplanmış və Şəmkir Regional Xüsusi Təhlükəli İnfeksiyalara Nəzarət Mərkəzinə göndərilmişdir.

12 Avqust 2026 15:52

Ağdaş heyvan satışı bazarı fəaliyyətə başlayıb

Ağdaş rayonunda yerləşən iri və xırdabuynuzlu heyvan satışı bazarı fəaliyyətini bərpa edib. Azərbaycan Qida Təhlükəsizliyi Agentliyinin (AQTA) qiymətləndirilməsindən sonra müasir baytarlıq-sanitariya və biotəhlükəsizlik tələblərinə uyğun yenidən təşkil olunub. Bazarda baytarlıq nəzarətinin həyata keçirilməsi üçün müvafiq şərait yaradılıb, kliniki baxış platforması, dezbaryerlər, izolyatorlar, heyvanların çəkisinin və bədən temperaturunun ölçülməsi üçün müvafiq avadanlıqlar quraşdırılıb.

7 Avqust 2026 17:14

Heyvan kəsimi məntəqələrində monitorinqlər aparılıb

Azərbaycan Respublikasının Qida Təhlükəsizliyi Agentliyi (AQTA) tərəfindən qida təhlükəsizliyinin təmin olunması, baytarlıq-sanitariya və sanitariya-gigiyena qaydalarına əməl olunmasına nəzarət məqsədilə respublika üzrə fəaliyyət göstərən kəsim məntəqələrində növbəti monitorinqlər həyata keçirilib.