Giriş
Heyvan sağlamlığı sahəsində işçi qrupun iclası keçirilib
16 Oktyabr 2019 17:17
Heyvan sağlamlığı sahəsində hazırlanan yeni texniki normativ hüquqi aktların beynəlxalq tələblərə uyğunlaşdırılmasının təmin edilməsi məqsədilə Azərbaycan Respublikasının Qida Təhlükəsizliyi Agentliyinin (AQTA) sədrinin müvafiq əmri ilə yaradılmış Heyvan sağlamlığı sahəsində işçi qrupun ilk iclası keçirilib.
Tədbirdə Səhiyyə, Kənd Təsərrüfatı, Ekologiya və Təbii Sərvətlər nazirliklərinin nümayəndələri və işçi qrupun digər üzvləri iştirak ediblər.
Bildirilib ki, işçi qrupun yaradılmasında məqsəd Azərbaycan Respublikasında heyvan xəstəlikləri ilə bağlı risklərin idarə edilməsi işinin təkmilləşdirilməsi, heyvanların sağlamlığının izlənilməsi və nəzarəti üzrə effektiv sistemin yaradılması, heyvan sağlamlığı sahəsində hazırlanan yeni texniki normativ hüquqi aktların Ümumdünya Heyvan Sağlamlığı Təşkilatının (OIE) “Quruda və suda yaşayan heyvanların sağlamlığı kodeksi”nin tələblərinə uyğunlaşdırılmasının təmin edilməsidir.
O da qeyd edilib ki, heyvan sağlamlığı sisteminin təşkmilləşdirilməsi zərurətindən irəli gələrək bir çox normativ hüquqi aktların həm yenilənməsinə, həm də yenilərinin hazırlanmasına ehtiyac var.
İclasda işçi qrupun əsasnaməsi, “Baytarlıq apteklərinin fəaliyyətinə dair təlimat”, “Səyyar heyvan kəsim düşərgələrinə dair baytarlıq-sanitariya tələbləri”, “Risklərin təhlili haqqında təlimat” müzakirə olunub, təkliflər dinlənilib.
Oxşar xəbərlər
Qanunsuz heyvan kəsimi ciddi risklər yarada bilər - VİDEO
Baytarlıq müayinəsindən keçməmiş, xəstə və ya xəstəlik şübhəsi olan heyvanların kəsilərək ətinin istehlaka təqdim edilməsi insan sağlamlığı üçün ciddi risklər yaradır. Belə heyvanlardan insanlara bruselyoz, qarayara, vərəm və digər zoonoz xəstəliklər keçə bilər.
AQTA heyvan kəsimi məntəqələrində sağlamlaşdırma işləri aparır
Azərbaycan Respublikasının Qida Təhlükəsizliyi Agentliyi (AQTA) tərəfindən heyvan kəsimi məntəqələrində aparılan son monitorinqlər zamanı müəyyən edilmiş sanitar-gigiyenik və sanitar-texniki nöqsanların aradan qaldırılması ilə bağlı sahibkarlara müvafiq göstərişlər verilib. Qısa müddət ərzində məntəqələrdə zəruri sağlamlaşdırma işləri aparılıb, aşkar edilmiş nöqsanlar aradan qaldırılıb və obyektlərin normativ tələblərə uyğunlaşdırılması təmin edilib. Sağlamlaşdırma işləri aparılan məntəqələr aşağıdakılardır: • Bakı şəhəri, Xətai rayonu, Nobel prospekti 56; • Bakı şəhəri, Nizami rayonu, Çobanzadə küçəsi 63, 2403-cü məhəllə; • Bakı şəhəri, Xəzər rayonu, Qala qəsəbəsi, Xaşa-Xuna bağ ərazisi.
Ölkə üzrə heyvanların identikləşdirilməsi genişləndiriləcək – Dövlət Proqramı
Prezidentin Sərəncamı ilə təsdiq edilən “Azərbaycan Respublikasında qida təhlükəsizliyinin təmin edilməsinə dair 2027–2032-ci illər üçün Dövlət Proqramı”nda heyvanların identikləşdirilməsi və məlumatların Avtomatlaşdırılmış Qida Təhlükəsizliyi İnformasiya Sisteminə (AQTİS) daxil edilməsi nəzərdə tutulur. Prosesin icrası ilə heyvan sağlamlığına nəzarət gücləndiriləcək və heyvan mənşəli məhsulların izlənilməsi təmin olunacaq. Bu çərçivədə heyvan sahibləri və fermerlər identikləşdirilmə prosesinin vacibliyi və tələbləri barədə məlumatlandırılacaq, müvafiq təlimlər keçiriləcək. Dövlət Proqramında heyvanların identifikasiyası və qeydiyyatı ilə bağlı rəqəmsal imkanların inkişafına da xüsusi diqqət yetirilir. Sənəddə Heyvanların İdentifikasiyası və Qeydiyyatı Sisteminin (HİQS) əhatə dairəsinin genişləndirilməsi və funksionallığının artırılmasının heyvan sağlamlığı və biotəhlükəsizliyin təmin olunması baxımından əhəmiyyəti vurğulanır. Sistem heyvanların düzgün qeydiyyatını, sağlamlıq vəziyyətinin izlənilməsini və müvafiq tədbirlərin vaxtında həyata keçirilməsini dəstəkləyir.
