İstixanalarda fitosanitar nəzarət tədbirləri davam etdirilir

9 Yanvar 2021 01:49

Ölkə ərazisinə fitosanitar nəzarətində olan zərərli orqanizmlərin daxil olmasının və yayılmasının qarşısını almaq, karantin obyektlərinin mühafizəsini təmin etmək məqsədilə bitkiçilik təsərrüfatlarında monitorinqlər davam etdirilir. 6-12 yanvar 2021-ci il tarixlərini əhatə edəcək növbəti monitorinqlərin ilk iki günü ərzində ümumilikdə 5 istixanada müvafiq tədbirlər həyata keçirilib. Azərbaycan Respublikasının Qida Təhlükəsizliyi Agentliyinin (AQTA) fitosanitar müfəttişləri və Azərbaycan Qida Təhlükəsizliyi İnstitutunun (AQTİ) mütəxəssisləri tərəfindən keçirilən monitorinqlər Tovuz, Samux, Bərdə, Yevlax və Gəncə şəhərində yerləşən pomidor yetişdirilən istixanaları əhatə edib.

İstixanalarda yetişdirilən tərəvəz məhsullarından nümunələr götürülərək karantin tətbiq edilən zərərli orqanizmlərin və məhsulun tərkibində toksikoloji göstəricilərin yoxlanması məqsədilə AQTİ-nin müvafiq laboratoriyalarına təqdim edilib. Monitorinqlər zamanı bitkiçilik təsərrüfatlarında aqrokimyəvi preparatların, pestisidlərin tətbiqi, sanitariya-gigiyena tələblərinə və təhlükəsizlik qaydalarına riayət olunması istiqamətində maarifləndirmə işləri aparılıb. Həmçinin bitki sağlamlığının təmin olunmasında sahibkarların üzərinə düşən məsuliyyət və qanunvericiliyin tələbləri barədə ətraflı məlumatlar verilib. Hazırda monitorinqlər digər rayonlar üzrə davam etdirilir

Oxşar xəbərlər

7 Avqust 2026 17:14

Heyvan kəsimi məntəqələrində monitorinqlər aparılıb

Azərbaycan Respublikasının Qida Təhlükəsizliyi Agentliyi (AQTA) tərəfindən qida təhlükəsizliyinin təmin olunması, baytarlıq-sanitariya və sanitariya-gigiyena qaydalarına əməl olunmasına nəzarət məqsədilə respublika üzrə fəaliyyət göstərən kəsim məntəqələrində növbəti monitorinqlər həyata keçirilib.

6 Avqust 2026 14:52

Müasir heyvan kəsimi məntəqələrinin inkişafı qida təhlükəsizliyini gücləndirir

Heyvan kəsimi fəaliyyətinin təkmilləşdirilməsi istiqamətində həyata keçirilən tədbirlər qida təhlükəsizliyinin təmin olunması və bioloji təhlükəsizlik sisteminin gücləndirilməsi baxımından mühüm əhəmiyyət daşıyır. Azərbaycan Qida Təhlükəsizliyi Agentliyinin (AQTA) şöbə müdiri Qalib Əbdüləliyev bildirib ki, ölkə başçısının müvafiq Sərəncamına əsasən, 2018-ci ildən etibarən ölkədə mobil, modul və stasionar tipli heyvan kəsim məntəqələrinin yaradılmasına başlanılıb. Agentlik tərəfindən müxtəlif tutumlu kəsim məntəqələrinin texnoloji sxemləri hazırlanaraq sahibkarlara təqdim edilib və bu istiqamətdə görülən işlər müsbət nəticələr verməkdədir.

5 Avqust 2026 09:50

Təsərrüfatlarda donuzlar arasında epizootoloji monitorinqlər keçiriləcək

Azərbaycan Respublikasının Qida Təhlükəsizliyi Agentliyi (AQTA) tərəfindən ölkəmizin donuzların Afrika taunu xəstəliyindən azad statusunun qorunub saxlanılması, eləcə də digər xəstəliklər üzrə epizootoloji vəziyyətin qiymətləndirilməsi məqsədilə mütəmadi monitorinqlər aparılır və nəticələr barədə Ümumdünya Heyvan Sağlamlığı Təşkilatına hesabatlar təqdim edilir.