Giriş
“Kənd təsərrüfatında rəqabətliliyin artırılması” layihəsi çərçivəsində növbəti görüş keçirilib
8 Aprel 2021 10:30
Dünya Bankının (DB) Azərbaycanda həyata keçirdiyi “Kənd təsərrüfatında rəqabətliliyin artırılması” layihəsi (Agricultural Competitiveness İmprovement Project) çərçivəsində Heyvanların İdentifikasiyası və Qeydiyyat Sisteminin (HİQS) proqram təminatının yaradılması ilə bağlı İtaliyanın “AGT S.p.A” şirkəti başda olmaqla, Çexiyanın “Solitea”, Şimali Makedoniyanın “EDUSOFT Limited” və Azərbaycanın “EKVİTA Consultants LLC” şirkətləri ilə görüş keçirilib.
Görüşdə iştirak edən Azərbaycan Respublikasının Qida Təhlükəsizliyi Agentliyinin sədr müavini Balarəhim Quliyev heyvan xəstəlikləri və qida təhlükəsizliyi ilə əlaqədar beynəlxalq tələblərə uyğun qurulacaq informasiya sistemi, mərkəzləşmiş qaydada heyvan xəstəliklərinə nəzarət və epidemioloji təhlil barədə məlumat verib. Tədbirdə həmçinin proqram təminatının kənd təsərrüfatı və ərzaq məhsullarının ticarəti zamanı mövcud olan nöqsanların aradan qaldırılması ilə bağlı fikirlər diqqətə çatdırılıb.
Qeyd edək ki, sözügedən layihənin məqsədi kənd məhsulları istehsalçılarına sanitariya və fitosanitariya xidmətlərinin təkmilləşdirilməsi, onlara maliyyə xidmətlərinin göstərilməsi, kənd sahibkarlığının və qida sənayesinin inkişaf etdirilməsi, bununla yanaşı, qida təhlükəsizliyi və keyfiyyəti sahəsində tənzimləmə işlərinin daha səmərəli təşkil etməkdir.
Oxşar xəbərlər
Heyvanların identifikasiyası niyə vacibdir? – Maarifləndirici çap məhsulları hazırlanıb
Azərbaycan Respublikasının Qida Təhlükəsizliyi Agentliyi (AQTA) tərəfindən Heyvanların İdentifikasiyası və Qeydiyyatı Sisteminin (HİQS) əhəmiyyəti ilə bağlı maarifləndirici çap məhsulları hazırlanıb. Materiallarda heyvanların fərdi identifikasiyasının baytarlıq tədbirlərinin daha dəqiq və effektiv həyata keçirilməsinə, xəstəliklərin vaxtında aşkarlanmasına və yayılmasının qarşısının alınmasına imkan verdiyi qeyd olunur. Həmçinin heyvanların identifikasiyasının Avtomatlaşdırılmış Qida Təhlükəsizliyi İnformasiya Sistemi (AQTİS) vasitəsilə həyata keçirildiyi, fermer və sahibkarların bu məqsədlə AQTA-nın regional bölmələrinə və Azərbaycan Qida Təhlükəsizliyi İnstitutuna (AQTİ) müraciət edə biləcəyi barədə məlumat verilir. Çap məhsulları fermerlər və təsərrüfat sahibləri arasında paylanılacaq və onların maarifləndirilməsi məqsədilə istifadə olunacaq.
Ölkədə fəaliyyətinə icazə verilən heyvan bazarlarının sayı 22-ə çatdı - VİDEO
Qazax və Gədəbəy rayonlarında yerləşən heyvan bazarlarının biotəhlükəsizlik, həmçinin müasir standartlara uyğun yenidənqurma və abadlaşdırma işlərindən sonra fəaliyyətinə icazə verilib. Belə ki, bazarların giriş-çıxış qapısında dezbaryerlər quraşdırılıb, baytarlıq nəzarəti zamanı xəstəlik əlamətləri aşkar edilən heyvanların digər heyvanlardan təcrid olunaraq saxlanılması məqsədilə xüsusi izolyatorlar tikilib.
Ölkənin 33 rayon və şəhərində müasir heyvan kəsimi məntəqələri qurulmalıdır - VİDEO
Ət və ət məhsullarının təhlükəsizliyinin təmin edilməsi baxımından heyvanların kəsiminin müvafiq baytarlıq-sanitariya və sanitariya-gigiyena tələblərinə cavab verən ixtisaslaşdırılmış kəsim məntəqələrində həyata keçirilməsi mühüm əhəmiyyət daşıyır. Azərbaycan Respublikasının Qida Təhlükəsizliyi Agentliyi (AQTA) tərəfindən aparılan monitorinqlər göstərir ki, hazırda ölkənin 33 rayon və şəhərində heyvan kəsimi məntəqəsi ya mövcud deyil, ya da fəaliyyət göstərmir. Əhalinin sıx məskunlaşdığı bu bölgələrdə heyvan kəsimi məntəqələrinin mövcud olmaması heyvanların kəsiminin əksər hallarda küçələrdə, yol kənarlarında həyata keçirilməsinə şərait yaradır. Bu da öz növbəsində kəsim prosesinin, eləcə də əldə olunan ət və ət məhsullarının təhlükəsizliyinə nəzarətin təmin edilməsində birbaşa çətinliklər yaradır.
