Giriş
Zaqatalada fındıq istehsalçıları və ixracatçıları ilə görüş keçirilib
9 Mart 2023 15:45
Azərbaycan Respublikasının Qida Təhlükəsizliyi Agentliyi (AQTA) bölgələrdə zərərvericilərə qarşı mübarizəyə dair maarifləndirici tədbirləri davam etdirir.
Tədbirlər çərçivəsində növbəti görüş Zaqatalada fındıq istehsalçıları və ixracatçıları ilə keçirilib. Görüşdə 1 yanvar 2023-cü il tarixdə qüvvəyə minmiş “Qida təhlükəsizliyi haqqında” Qanunda öz əksini tapmış yeniliklər sahibkarların diqqətinə çatdırılıb, formalaşmış hüquqi baza haqqında geniş məlumat verilib.
Tədbirdə son dövrlərdə karantin tətbiq edilən qəhvəyi mərmər bağacığına qarşı qışlama yerlərində həyata keçirilən mexaniki mübarizə tədbirləri haqqında məlumat verilib, yeni mövsümdə zərərvericinin vura biləcəyi zərəri minumuma endirmək məqsədilə sahibkarlar tərəfindən feromon tələ və pestisid ehtiyatının əvvəlcədən yaradılmasının vacibliyi bildirilib.
Görüşdə fındıq ixracı zamanı qarşıya çıxan əsas problemlər, ixrac prosesi zamanı məhsullardan götürülmüş nümunələrin müayinələrinin nəticələri və təhlükəsiz məhsul istehsalı ilə bağlı məlumatlar diqqətə çatdırılıb, sahibkarları narahat edən fındıqda aflatoksin problemi və onun aradan qaldırılması yolları barədə fikir mübadiləsi aparılıb, eyni zamanda aflatoksinin yaranmaması üçün aqrotexniki qaydalara, həmçinin normativ aktların tələblərinə riayət edilməsinin zəruriliyi vurğulanıb.
Tədbirdə “Fındıq məhsullarında aflatoksinin qarşısının alınması ilə bağlı tədbirlərə dair Risk İdarəetmə Planı”na uyğun olaraq 2023-cü ildə aflatoksinlə bağlı bir çox məsələlərin həlli istiqamətində işlərin görüləcəyi, xüsusilə təsərrüfat subyektləri, fermerlər, istehsalçılar ilə müxtəlif mövzularda maarifləndirici görüşlərin təşkil ediləcəyi, fındıq yığımı və tədarükü tarixlərinin müəyyən ediləcəyi, emal müəssisələrinin vəziyyətinin müəyyənləşdirilməsi məqsədilə monitorinqlərin təşkili kimi vacib tədbirlərin həyata keçiriləcəyi bildirilib.
Sonda sahibkarları maraqlandıran suallar cavablandırılıb, “Aflatoksinsiz fındıq”, “Qəhvəyi mərmər bağacığı” və “Qida məhsullarının etiket məlumatları” adlı bukletlər paylanılıb.
Oxşar xəbərlər
Xankəndi və Xocalıda zərərvericilərə qarşı maarifləndirmə tədbirləri keçirilib
Azərbaycan Respublikası Qida Təhlükəsizliyi Agentliyinin əməkdaşları tərəfindən Xankəndi şəhərində, eləcə də Xocalı rayonunun Şuşakənd, Malıbəyli və Quşçular kəndlərində fitosanitar nəzarət və maarifləndirmə tədbirləri keçirilib. Tədbirlərin əsas məqsədi qəhvəyi mərmər bağacığı və Amerika ağ kəpənəyinin ölkə ərazisində yayılmasının qarşısının alınması, bu zərərvericilərin vaxtında aşkar edilməsi və sakinlərin bu sahədə məlumatlılıq səviyyəsinin artırılmasıdır. Yerli sakinlərə karantin tətbiq edilən zərərvericilərin bioloji xüsusiyyətləri, yayılma yolları, xarakterik əlamətləri, habelə kənd təsərrüfatı bitkilərinə və yaşıllıqlara vura biləcəyi zərərlər barədə ətraflı məlumat verilib. Zərərvericilərin yayılmasının qarşısını almaq üçün xüsusilə payız-qış mövsümündə həyata keçirilməsi tövsiyə olunan mexaniki və profilaktik mübarizə tədbirləri izah olunub. Tədbirlər çərçivəsində zərərvericilərin vaxtında müəyyən edilməsi, onların mümkün yayılma ocaqlarının aşkarlanması və müvafiq mübarizə tədbirlərinin görülməsinin əhəmiyyəti diqqətə çatdırılıb, sakinlərə maarifləndirici çap materialları paylanıb.
Amerika ağ kəpənəyi və Qəhvəyi mərmər bağacığı ilə bağlı maarifləndirmə tədbirləri davam etdirilir
Amerika ağ kəpənəyi və Qəhvəyi mərmər bağacığının ölkə ərazisində yayılmasının qarşısının alınması və zərərvericilərlə mübarizə məqsədilə Azərbaycan Respublikasının Qida Təhlükəsizliyi Agentliyi tərəfindən fitosanitar nəzarət və maarifləndirmə tədbirləri davam etdirilir. Zərərvericilərə qarşı bitki mühafizəsi tədbirləri çərçivəsində Şəki-Zaqatala regional bölməsinin əməkdaşları tərəfindən Oğuz rayonunun Bucaq, Bayan, Qəbələ rayonunun isə Mirzəbəyli kəndlərində sakinlərlə maarifləndirici görüşlər keçirilib. Görüşlər zamanı zərərvericilərin bioloji xüsusiyyətləri, yayılma səbəbləri, bitkilərə vurduğu zərər, xüsusilə Amerika ağ kəpənəyinin tırtıl mərhələsində yaratdığı təhlükə və ona qarşı mübarizə tədbirləri barədə vətəndaşlara məlumat verilib. Eyni zamanda, zərərvericilərin vaxtında aşkarlanmasının və onların yayılmasının qarşısının alınması məqsədilə mütəmadi müşahidə və monitorinqlərin aparılmasının vacibliyi diqqətə çatdırılıb. Tədbirlər çərçivəsində kənd sakinlərinə zərərvericilərlə bağlı maarifləndirici bukletlər təqdim olunub, onların sualları cavablandırılıb və müvafiq fitosanitar tələblərə əməl olunması ilə bağlı tövsiyələr verilib.
Qəhvəyi mərmər bağacığı ilə bağlı maarifləndirmə tədbirləri davam etdirilir
Qəhvəyi mərmər bağacığının ölkə ərazisində yayılmasının qarşısının alınması məqsədilə Qida Təhlükəsizliyi Agentliyi tərəfindən fitosanitar nəzarət və maarifləndirmə tədbirləri davam etdirilir. Zərərvericiyə qarşı bitki mühafizəsi tədbirləri çərçivəsində Quba-Xaçmaz regional bölməsinin əməkdaşları tərəfindən Xaçmaz rayonunun Arzu kəndində kənd sakinləri ilə maarifləndirici görüşlər keçirilib. Görüşlər zamanı qəhvəyi mərmər bağacığının payız aylarında açıq sahələri tərk edərək qışlama məqsədilə evlərə, anbarlara və digər qapalı tikililərə toplanması barədə sakinlərə məlumat verilib. Eyni zamanda, zərərvericinin sayının azaldılmasında effektiv üsullardan biri olan mexaniki mübarizə tədbirləri və onların tətbiqi qaydaları izah edilib, kənd sakinlərinə qəhvəyi mərmər bağacığı haqqında məlumat kitabçaları paylanıb.
