Bakı Ekspo Mərkəzində “Caspian Agro Week” – 19-cu Azərbaycan Beynəlxalq Kənd Təsərrüfatı Sərgi və Forumu, “InterFood Azerbaijan” – 31-ci Azərbaycan Beynəlxalq Qida Sənayesi Sərgisi, eləcə də “Horeca Caspian” – 14-cü Xəzər Beynəlxalq Mehmanxana, Restoran və Supermarketlər üçün Avadanlıq və Ləvazimatlar Sərgisi açılıb.

Azərbaycan Respublikasının Qida Təhlükəsiziyi Agentliyi (AQTA) tərəfindən Rumıniya Respublikasının qida obyektləri üzrə təsdiq sisteminin ekvivalentliyi tanınıb. Bununla bağlı AQTA qərar qəbul edib.

Azərbaycan Qida Təhlükəsizliyi İnstitutu (AQTİ) tərəfindən ölkədə qida təhlükəsizliyi sahəsində fəaliyyət göstərən sahibkarlıq subyektlərinin xidmət keyfiyyətinin yüksəldilməsi, eləcə də qabaqcıl təcrübə və beynəlxalq standartlara çıxış imkanlarının genişləndirilməsi məqsədilə maarifləndirici təlimlər davam etdirilir. “Qida sahəsində gigiyena tələbləri” mövzusunda növbəti təlim qida ilə təmasda olan mütəxəssislər üçün təşkil olunub.

Qida Təhlükəsizliyi Agentliyinin “AQTA hara baxır?” layihəsinin növbəti buraxılışında kolbasa məhsullarına nəzarət mexanizmlərindən bəhs olunur.

Qida Təhlükəsizliyi Agentliyinin “Sağlam məktəbli” layihəsi çərçivəsində Laçın rayonunda məktəblilər üçün növbəti maarifləndirici görüş keçirilib. Bu dəfə tədbir Taxtakörpü qəsəbəsində yerləşən məktəbdə təşkil olunub.

Taxıl bitkilərinin mövcud fitosanitar vəziyyətinin qiymətləndirilməsi, zərərli orqanizmlərin erkən mərhələdə müəyyən edilməsi və yayılma risklərinin təhlili məqsədilə Qida Təhlükəsizliyi Agentliyinin əməkdaşları tərəfindən Şəki və Qax rayonlarının taxıl sahələrində monitorinqlər aparılıb. Monitorinqlər Milli Monitorinq Planına uyğun olaraq həyata keçirilib və bu il ilk dəfə olaraq taxıl sahələri də plana daxil edilib. Monitorinqlər zamanı sahələrdə bitkilərin inkişaf fazasına uyğun olaraq müşahidələr aparılıb. Xəstəlik və zərərverici əlamətləri müşahidə olunan bitkilərdən nümunələr götürülərək laborator müayinələrə cəlb edilib. Bəzi sahələrdə mövsümə uyğun xəstəliklər müşahidə olunsa da, karantin tətbiq edilən zərərli orqanizmlər qeydə alınmayıb. Həmçinin əkin sahələrində tətbiq edilən aqrotexniki tədbirlərin effektivliyi qiymətləndirilib. Təsərrüfat subyektləri ilə aparılan müzakirələr zamanı düzgün becərmə texnologiyaları, növbəli əkin sisteminin tətbiqi və inteqrir mübarizə üsullarının əhəmiyyəti barədə ətraflı məlumat verilib. Əkin sahələrində fitosanitar vəziyyətin stabilliyinin təmin edilməsi məqsədilə monitorinqlərin mərhələli şəkildə davam etdirilməsi planlaşdırılır.

Azərbaycan Qida Təhlükəsizliyi Agentliyi (AQTA) ölkədə erkən yaşda heyvan kəsiminin qarşısının alınması istiqamətində “Erkən kəsimə son!” maarifləndirmə kampaniyasını davam etdirir.  Həkim-nutrisioloq Emil Hidayətli də kampaniyaya qoşularaq vətəndaşlara çağırış edib. Onun sözlərinə görə, quzu ətinin yumşaqlığının əsas səbəbi tərkibində kollagenin olmamasıdır. Yetişmiş qoyun əti isə kollagenlə daha zəngindir. Kollagen bizim əzələlərimiz, oynaqlarımız, bağlar, vətərlər, bağırsaq divarı, dəri üçün mühümdür.  Emil Hidayətli qeyd edib ki, ətin bioloji və qida dəyəri içində yağın da böyük önəmi var: “Quzuda isə yağ azdır. Amma bizim orqanizm üçün mütləq doymuş, faydalı yağlar lazımdır. Yetişmiş ət, qoyun əti yeməklə biz faydalı yağı ala bilirik”. Daha ətraflı məlumat üçün linkə keçid edə bilərsiniz:

Qida Təhlükəsizliyi Agentliyinin Şirvan-Salyan regional bölməsinin müfəttişləri Biləsuvar rayon Polis Şöbəsinin əməkdaşları ilə birgə aparılan reyd zamanı 77 XB 918 dövlət qeydiyyat nişanlı “Toyota Corolla” markalı avtomobilə baxış keçirib.  Yoxlama zamanı antisanitar şəraitdə polietilen kisələrdə saxlanılan 205 kq sümüksüz at əti aşkarlanıb.  Araşdırma zamanı at ətinin Biləsuvar rayonunun Bəydili kənd sakini Əzizov Məlik Sabir oğluna məxsus olduğu müəyyən edilib. Nümunələr götürülərək laborator müayinələrə cəlb olunub, at əti saxlanca verilib. Araşdırmalar davam etdirilir.

Azərbaycan Qida Təhlükəsizliyi İnstitutu (AQTİ) tərəfindən “Vahid Sağlamlıq” (One Health) mentorluq proqramına start verilir. Bu proqramın məqsədi tələbələrin “Vahid Sağlamlıq” yanaşmasına uyğun hazırlanması, onların strateji düşünən və müasir çağırışlara cavab verən peşəkar mütəxəssis kimi formalaşdırılmasıdır.  Mentorluq proqramına seçilən iştirakçılar AQTİ-nin rəhbər şəxsləri və ölkənin aparıcı ekspertləri ilə birbaşa kommunikasiya imkanı əldə edəcəklər. 12 həftəlik inkişaf proqramı çərçivəsində iştirakçılara idarəçilik, elmi yanaşma və qlobal çağırışlara dair tövsiyələr təqdim olunacaq. Təşəbbüs qida təhlükəsizliyi, bitki və heyvan sağlamlığı, eləcə də ictimai səhiyyə sahələrində təhsil alan tələbələrin bilik və bacarıqlarını inkişaf etdirməklə, bu istiqamətlərdə gələcəkdə aparıcı rol oynaya biləcək yüksək ixtisaslı insan kapitalının formalaşdırılmasını hədəfləyir. Proqram müddətində mentorluq görüşləri, texniki biliklərin inkişafı və praktiki tətbiqi, həmçinin tematik master-klasslar və sessiyalar iştirakçıların ixtisasına, ehtiyaclarına və motivasiyasına uyğun şəkildə təşkil ediləcək. Müraciət, qiymətləndirmə və seçim prosesi şəffaf və obyektiv meyarlar əsasında aparılacaq. Namizədlər uyğunluq, motivasiya və rəqabət prinsipləri nəzərə alınaraq seçiləcəklər. “Vahid Sağlamlıq” mentorluq proqramı haqqında ətraflı məlumatı AQTİ-nin rəsmi internet səhifəsindən (https://afsi.gov.az/az/mentorship) öyrənmək mümkündür. Proqrama müraciət yaxın günlərdə elan olunacaq.

Qəhvəyi mərmər bağacığı ciddi təhlükə yaradan zərərvericilərdən biridir. 300-dən çox bitki növü ilə qidalanaraq məhsuldarlığın azalmasına səbəb olur. Ölçüsü 12–17 mm olan bu həşərat qəhvəyi rəngli, ləkəli və armudvari bədən quruluşuna malikdir. 35–100 km məsafəni uça bilməsi onun sürətlə yayılmasına şərait yaradır. Yaz və yay aylarında əkin sahələrində mütəmadi müşahidə aparmaq vacibdir. Xüsusilə yarpaqların alt hissəsi, tumurcuqlar və meyvə saplaqları nəzərdən keçirilməlidir. Zərərverici aşkar edildikdə sahələrdə və təsərrüfat tikililərində feromon tələlərin quraşdırılması effektiv üsullardan biridir. Yaşayış yerlərində isə mebel arxaları, divar boşluqları və digər gizli sahələr yoxlanmalıdır. Bağacıq aşkar edilərsə, süpürgə və ya tozsoran vasitəsilə toplanaraq məhv edilməsi tövsiyə olunur. Kimyəvi mübarizə tədbirləri isə yalnız mütəxəssis tövsiyəsi ilə və axşam saatlarında aparılmalıdır. Qəhvəyi mərmər bağacığına qarşı mübarizə tədbirləri barədə ətraflı məlumat almaq üçün aşağıdakı əlaqə vasitələrindən istifadə edə bilərsiniz: - 1003 - Çağrı Mərkəzi - (+994) 99 708 85 88 (qərb rayonları üzrə) - (+994) 99 308 85 88 (şimal-qərb rayonları üzrə) - Aqrar Xidmətlər Agentliyi: 088-588

Azərbaycan Respublikasının Qida Təhlükəsizliyi Agentliyində (AQTA) bitki mühafizə vasitələri və aqrokimyəvi maddələrin istehsalı sahəsində fəaliyyət göstərən sahibkarlıq subyektlərinin nümayəndələri ilə görüş keçirilib. Görüşdə aqrokimyəvi maddələrin və pestisidlərin istehsalında şəffaflığın və effektiv nəzarətin xüsusi əhəmiyyət daşıdığı vurğulanıb. Bildirilib ki, idxal olunan xammal yalnız istehsal edilən məhsulun tərkibinə uyğun şəkildə istifadə edilməli, hər bir məhsul üzrə tərkib isə açıq və dəqiq formada təqdim olunmalıdır.  Bununla yanaşı, xammalın ölkəyə daxil olmasından son məhsulun əldə edilməsinədək bütün istehsal mərhələlərinin izlənilə bilən və müvafiq qaydada sənədləşdirilməsi vacibdir. Sahibkarlara bir daha xatırladılıb ki, ölkəyə idxal edilən bu növ xammalın ayrıca satışına yol verilmir və bu qaydanın pozulması ciddi hüquqi məsuliyyət yaradır.  Eyni zamanda qeyd olunub ki, aqrokimyəvi maddələrin və pestisidlərin istehsalında istifadə olunan xammalın idxalı zamanı prosedurların sadələşdirilməsi, operativliyin artırılması və sahibkarlar üçün daha əlverişli mühitin formalaşdırılması istiqamətində əlavə tədbirlərin görülməsi nəzərdə tutulur. Görüş çərçivəsində sahibkarları maraqlandıran suallar cavablandırılıb və qarşılıqlı fikir mübadiləsi aparılıb.

Məktəb bufetlərinə nəzarətin gücləndirilməsi, sanitar-gigiyenik qaydalara riayət olunmasının təmin edilməsi və şagirdlər arasında sağlam qidalanma vərdişlərinin təşviqi məqsədilə Qida Təhlükəsizliyi Agentliyinin əməkdaşları tərəfindən maarifləndirici tədbirlər davam etdirilir. Növbəti görüş Abşeron-Xızı Regional Təhsil İdarəsinin nümayəndələri, habelə Sumqayıt şəhəri, Abşeron və Xızı rayonlarında qida bloku olan ümumtəhsil müəssisələrinin rəhbərləri və məsul şəxslərinin iştirakı ilə keçirilib. Tədbirdə Agentliyin mütəxəssisləri tərəfindən qida təhlükəsizliyi sahəsində qüvvədə olan normativ hüquqi aktların tələbləri, məktəb bufetlərində tətbiq olunan sanitar-gigiyenik və texniki-normativ qaydalar barədə ətraflı məlumat verilib. Qida məhsullarının düzgün saxlanması, daşınması və istehlak şərtləri, həmçinin qida zəhərlənmələrinin profilaktikası və qarşısının alınması yolları izah olunub. Sağlam qidalanma prinsipləri və keyfiyyətli qidanın gənc nəslin fiziki inkişafında rolu diqqətə çatdırılıb. Sonda iştirakçıların sualları cavablandırılıb.