Azərbaycan Qida Təhlükəsizliyi İnstitutu (AQTİ) tərəfindən “Hotels Qrup” MMC-nin qida ilə təmasda olan əməkdaşları üçün “Qida sahəsində gigiyena tələbləri” mövzusunda təlim təşkil olunub. Təlim zamanı iştirakçılara qüvvədə olan qanunvericiliyin tələbləri, qida məhsullarının qəbulu, saxlanması və emalı qaydaları, işçi heyətin şəxsi gigiyenası, eləcə də istehsal və iş sahələrində sanitariya-gigiyena normalarına dair ətraflı məlumat verilib. Bununla yanaşı, çarpaz çirklənmə risklərinin qarşısının alınması, temperatur rejiminə nəzarət və qida məhsullarının təhlükəsiz hazırlanması məsələləri diqqətə çatdırılıb. İnteraktiv formatda keçirilən təlimin sonunda iştirakçıların sualları cavablandırılıb, əldə etdikləri biliklər qiymətləndirilib.

Göbələk zəhərlənmələri əsasən tərkibində təbii toksinlər olan zəhərli yabanı göbələklərin istehlakı nəticəsində baş verir. Belə halların yaranmasının əsas səbəbləri göbələk növlərinin düzgün tanınmaması, zəhərli növlərin yeməli göbələklərlə qarışdırılması, eləcə də məhsulun toplanması, saxlanması və hazırlanması zamanı təhlükəsizlik qaydalarına əməl edilməməsidir. Xüsusilə qeyd edilməlidir ki, bəzi zəhərli göbələklər zahiri görünüşünə görə yeməli növlərlə çox oxşardır. Buna görə də göbələklərin yalnız rənginə, formasına, qoxusuna və digər zahiri əlamətlərinə əsaslanaraq onların yeməli və ya zəhərli olduğunu müəyyən etmək mümkün deyil. Göbələk zəhərlənmələri daha çox yaz və payız aylarında, yabanı göbələklərin təbiətdən toplanması və istehlakının intensivləşdiyi dövrlərdə müşahidə olunur. Zəhərlənmənin ağırlıq dərəcəsi göbələyin növündən və tərkibindəki toksinlərin xüsusiyyətlərindən asılıdır. Bəzi zəhərli göbələklərin istehlakı qaraciyər və böyrəklərin zədələnməsinə, sinir sisteminin fəaliyyətinin pozulmasına, mədə-bağırsaq pozğunluqlarına, ağır hallarda isə ölümə səbəb ola bilər. Göbələk zəhərlənmələrinin qarşısının alınması məqsədilə istehlakçılara mənşəyi və növü məlum olmayan yabanı göbələkləri toplamamaq və istehlak etməmək tövsiyə olunur. Həmçinin göbələklərin küçə ticarəti və səyyar satış məntəqələrindən alınmasından çəkinmək vacibdir. Belə satış yerlərində məhsulun mənşəyini, toplandığı ərazini, eləcə də toplanma və saxlanma şəraitini müəyyənləşdirmək çətin ola bilər. Buna görə də göbələk alarkən mənşəyi məlum olan və müvafiq tələblərə uyğun fəaliyyət göstərən stasionar satış məntəqələrinə üstünlük verilməlidir.

Azərbaycan Respublikası Qida Təhlükəsizliyi Agentliyinin (AQTA) sədri Qoşqar Təhməzlinin Gəncə şəhərində keçiriləcək vətəndaş qəbulunun vaxtı dəyişdirilib. Qəbul noyabrın 24-ü saat 11:00-da Gəncə şəhər Heydər Əliyev Mərkəzində baş tutacaq. Görüşdə Gəncə, Naftalan şəhərləri və Samux, Daşkəsən, Göygöl, Goranboy, Xocalı, Kəlbəcər rayonlarından olan vətəndaşlar iştirak edə bilərlər. Vətəndaşlar ad, soyad, ata adı, müraciətin məzmunu, yaşayış ünvanı və telefon nömrəsini göstərməklə info@afsa.gov.az elektron ünvanına rəsmi şəkildə müraciət edərək və ya “1003-Çağrı Mərkəzi” ilə əlaqə saxlayaraq noyabrın 23-dək qəbula yazıla bilərlər. Qəbul zamanı Agentliyin səlahiyyət dairəsinə aid müraciətlər cavablandırılacaq, müraciətlərdə əksini tapan məsələlərin həlli ilə əlaqədar tədbirlər görüləcək.

Mediada yayılan məlumat əsasında Azərbaycan Respublikası Qida Təhlükəsizliyi Agentliyinin əməkdaşları Bakı şəhəri, Sabunçu rayonu, Zabrat qəsəbəsi, X.Əliyev küçəsində yerləşən, fiziki şəxs Lyubimov Tahir Qəhrəman oğluna məxsus ət emalı müəssisəsində yoxlama keçirib. Müəssisənin qida təhlükəsizliyi sahəsində təsdiq olunmadan qanunsuz fəaliyyət göstərdiyi, toyuq ətlərinin müşayiətedici sənədlərinin olmadığı, eləcə də sanitar-gigiyenik və sanitar-texniki qaydaların pozulduğu aşkarlanıb. Faktla bağlı fiziki şəxs barəsində inzibati protokol tərtib olunub, toyuq ətlərindən götürülən nümunələr laborator müayinələrə cəlb edilib və məhsulların dövriyyəsi qadağan edilib, nöqsanlar aradan qaldırılanadək müəssisənin fəaliyyəti dayandırılıb.

Azərbaycan Respublikasının Qida Təhlükəsizliyi Agentliyi (AQTA) qəhvəyi mərmər bağacığının ölkə ərazisində yayılmasının qarşısının alınması məqsədilə maarifləndirmə tədbirlərini davam etdirir. Bu çərçivədə növbəti maarifləndirici videoçarx hazırlanıb. Videomüraciətdə fermerlərin zərərverici ilə mübarizədə iştirakı, qışlama dövründə onun aşkar edilərək məhv edilməsinin əhəmiyyəti vurğulanır. Bildirilir ki, 300-dən çox bitki növü ilə qidalanan qəhvəyi mərmər bağacığı kənd təsərrüfatına ciddi ziyan vura bilər. AQTA əhalini və fermerləri zərərvericiyə qarşı mübarizədə fəal olmağa, qışlama yerlərində aşkar edilən bağacıqları zərərsizləşdirməyə çağırır. Qışlama dövründə aparılan mübarizə tədbirləri zərərvericinin sayının azalmasına və növbəti mövsümdə yayılmasının qarşısının alınmasına mühüm töhfə verir. Daha ətraflı:

Azərbaycan Qida Təhlükəsizliyi İnstitutu (AQTİ) tərəfindən “Vahid Sağlamlıq” mentorluq proqramı çərçivəsində seçilmiş tələbələrin bilik və bacarıqlarının inkişaf etdirilməsi, peşəkar istiqamətləndirilməsi və praktiki təcrübələrinin artırılması məqsədilə onların fərdi profillərinə və maraq dairələrinə uyğun mentorlarla görüşləri keçirilir. Proqramın 12 həftəlik ardıcıl və standartlaşdırılmış inkişaf modeli əsasında iştirakçılara qida təhlükəsizliyi, bitki və heyvan sağlamlığı, eləcə də ictimai sağlamlıq sahələrini əhatə edən müvafiq bilik və təcrübələr aşılanır. Görüşlər zamanı mentorlar tərəfindən tələbələrlə müvafiq sahələr üzrə aktual məsələlər, mövcud çağırışlar, qabaqcıl yanaşmalar və praktiki fəaliyyət istiqamətləri barədə müzakirələr aparılır. Eyni zamanda, tələbələrin nəzəri biliklərinin real iş mühitində tətbiqi, analitik düşünmə, problem həll etmə və peşəkar ünsiyyət bacarıqlarının inkişafına xüsusi diqqət yetirilir. Mentorluq görüşləri ilə paralel olaraq texniki biliklərin dərinləşdirilməsi məqsədilə müvafiq ekspertlərlə müzakirələrin aparılması prosesi də həyata keçirilir.

Azərbaycan Qida Təhlükəsizliyi İnstitutunun (AQTİ) Rəqəmsal və İnnovativ Təlim Mərkəzi (RİTM) qida təhlükəsizliyi, bitki və heyvan sağlamlığı sahələrində müasir bilik və bacarıqların əldə olunması üçün yeni imkanlar yaradır. Rəqəmsal platforma sahibkarlar, qida ilə təmasda olan əməkdaşlar, tələbələr və mütəxəssislər üçün müxtəlif istiqamətlər üzrə təlimlərə məsafədən qoşulmaq imkanı təqdim edir. Xüsusilə regionlarda fəaliyyət göstərən kiçik və orta sahibkarlıq subyektləri üçün əlçatan olan platforma qanunvericiliyin tələb etdiyi gigiyenik təlimlərdə iştirakı da asanlaşdırır. Təlimləri uğurla başa vuran iştirakçılar elektron rəsmi sertifikat əldə edirlər.                                 Ətraflı linkə keçid edin:

Hər gün alış-veriş etdiyimiz bazarlarda ərzaq məhsullarının təhlükəsizliyinə necə əmin ola bilərik? Məhsulların saxlanması, daşınması və satışı zamanı hansı tələblərə əməl olunmalıdır? “Qidanın Nəbzi” podkastının növbəti buraxılışında təhlükəsiz ərzaq bazarının əsas şərtlərindən, sahibkar və istehlakçıların məsuliyyətindən danışırıq.

Serbiyada Avropa və Aralıq dənizi Bitki Mühafizəsi Təşkilatı (EPPO) tərəfindən “Zərərli orqanizmlərin prioritetləşdirilməsi və risk analizinin əsas elementləri” mövzusunda beynəlxalq təlim keçirilib. 24-dən çox ölkənin milli bitki mühafizəsi qurumlarının təmsil olunduğu tədbirdə Azərbaycan Respublikası Qida Təhlükəsizliyi Agentliyinin (AQTA) Bitki sağlamlığında risklərin və böhran vəziyyətlərinin idarə edilməsi sektorunun müdiri Vəfa Rüstəmova da iştirak edib. Təlim çərçivəsində zərərli orqanizmlərin coğrafi arealı və yayılma potensialının qiymətləndirilməsi, eləcə də mümkün iqtisadi və ekoloji təsirlərin təhlili məsələləri müzakirə olunub. Bununla yanaşı, EPPO-nun risk analizi metodologiyaları əsasında praktiki məşğələlər təşkil edilib.

Azərbaycan xalqı böyük qürur və iftixar hissi ilə dövlətçilik tariximizin ən şanlı səhifələrindən biri olan 8 Noyabr – Zəfər Gününün 6-cı ildönümünü qeyd edir. Azərbaycan Respublikası Qida Təhlükəsizliyi Agentliyində (AQTA) Vətən müharibəsində iştirak etmiş, eləcə də ailə üzvləri şəhid və ya qazi olmuş əməkdaşların iştirakı ilə Zəfər Gününə həsr olunmuş tədbir keçirilib. Mərasimdə Vətənimizin ərazi bütövlüyü uğrunda canlarından keçmiş şəhidlərin əziz xatirəsi yad edilib, Dövlət Himni səsləndirilib. Daha sonra işğaldan azad edilmiş ərazilərdə həyata keçirilən tikinti-quruculuq işlərini və əhalinin doğma torpaqlarına qayıdışını əks etdirən videoçarx nümayiş olunub. Tədbirdə vurğulanıb ki, 44 günlük Vətən müharibəsində qazanılmış Zəfər Qarabağ və Şərqi Zəngəzurda yeni quruculuq və inkişaf mərhələsinin əsasını qoyub. Hazırda işğaldan azad edilmiş ərazilərdə genişmiqyaslı bərpa və yenidənqurma işləri aparılır, şəhər və kəndlər müasir standartlara uyğun qurulur, soydaşlarımızın doğma torpaqlarına təhlükəsiz və dayanıqlı qayıdışı təmin edilir. Prezident İlham Əliyevin rəhbərliyi ilə həyata keçirilən Böyük Qayıdış siyasəti bu ərazilərin sosial-iqtisadi inkişafına və əhalinin layiqli yaşayış şəraiti ilə təmin olunmasına xidmət edir. Tədbirdə Vətən müharibəsində iştirak etmiş Agentlik əməkdaşları döyüş yolları ilə bağlı xatirələrini bölüşüb, onlara göstərilən diqqət və qayğıya görə təşəkkürlərini bildiriblər.