Azərbaycan Meyvə-Tərəvəz İstehsalçıları və İxracatçıları Assosiasiyası “Qida təhlükəsizliyi tək dövlətin deyil, hər kəsin işidir” çağırış kampaniyasına dəstək verir Azərbaycan Respublikasının Qida Təhlükəsizliyi Agentliyi yanında Məşvərət Şurası “Qida təhlükəsizliyi tək dövlətin deyil, hər kəsin işidir” kampaniyasını davam etdirir. Kampaniya çərçivəsində təqdim olunan növbəti videoçarxda Şuranın üzvü, Azərbaycan Meyvə-Tərəvəz İstehsalçıları və İxracatçıları Assosiasiyasının İdarə Heyətinin sədri Bəşir Quliyev meyvə-tərəvəz istehsalında təhlükəsiz və keyfiyyətli məhsul yetişdirməyin əsas meyarlarından danışır. O qeyd edir ki, meyvə və tərəvəzlərin təhlükəsiz və keyfiyyətli olması üçün bitkilər sağlam yetişdirilməli, torpaq düzgün qidalanmalı və vaxtında suvarılmalıdır. İxrac məhsullarında etiketləmə və qablaşdırmanın idxalçı ölkələrin tələblərinə uyğun aparılması məhsulun izlənməsi və təhlükəsizliyinin təmininə xidmət edir. Bəşir Quliyevin sözlərinə görə bu prinsiplərə əməl olunması ölkənin güclü qida təhlükəsizliyi sisteminin göstəricisidir. Bu isə sağlam məhsul, etibarlı bazar, artan ixrac və daha çox iqtisadi gəlir deməkdir. Qida təhlükəsizliyi tək dövlətin deyil, hər kəsin işidir! Gəlin, təhlükəsiz qida ilə sağlam gələcəyə birlikdə addımlayaq!

Qida Təhlükəsizliyi Agentliyinin Şəki-Zaqatala regional bölməsinin əməkdaşları kənd təsərrüfatı sahəsində dayanaqlılığın təmin olunması, həmçinin bitki sağlamlığının qorunması istiqamətində bilik və bacarıqların artırılması məqsədilə maarifləndirici görüş keçirib.  Görüş zamanı iştirakçılara bitki mühafizə vasitələrinin və aqrokimyəvi maddələrin normativ tələblərə uyğun tətbiqi, saxlanma, daşınma və istifadə qaydaları, həmçinin insan sağlamlığına və ətraf mühitə təsirləri barədə ətraflı məlumat verilib.  Daha sonra müvafiq sahədə fəaliyyət göstərən sahibkarların mövzu ilə bağlı sualları cavablandırılıb, sahələrdə pestisidlərin və gübrələrin istifadəsində yol verilən ümumi nöqsanlar və onların qarşısının alınması üsulları müzakirə olunub.

Azərbaycan Qida Təhlükəsizliyi Agentliyi (AQTA) yeni tədris ilində “Sağlam məktəbli” layihəsini davam etdirir. AQTA-nın təşəbbüsü ilə həyata keçirilən bu maarifləndirmə proqramı şagirdlərin sağlam qidalanma və qida təhlükəsizliyi sahəsində biliklərini artırmaq, məktəb mühitində sağlam vərdişləri gücləndirmək məqsədi daşıyır.  Görüş çərçivəsində məktəblilərə Agentliyin fəaliyyət istiqamətləri, eləcə də qida təhlükəsizliyinin təmin olunması və sağlam qidalanmanın vacibliyi barədə məlumat veriləcək. Azərbaycan Qida Təhlükəsizliyi İnstitutunun mütəxəssisləri tərəfindən sağlam qidalanma ilə bağlı müxtəlif interaktiv oyunlar təşkil olunacaq. Həmçinin AQTA könüllüləri sagirdlərə maarifləndirici bukletlər paylayacaq. Qeyd edək ki, 2018-ci ildə start verilən “Sağlam məktəbli” layihəsi çərçivəsində məktəblilərlə belə görüşlərin davamlı olaraq təşkil edilməsi planlaşdırılıb.

Ümumdünya Heyvan Sağlamlığı Təşkilatının (ÜHST) rəsmi məlumatlarına əsasən, Bolqarıstan Respublikasının Köstəndil vilayətinə xırdabuynuzlu heyvanların çiçək xəstəliyi, Serbiya Respublikasının Şumadiya dairəsində blutanq xəstəliyi, Fransa Respublikasının Oksitaniya regionunda nodulyar dermatit xəstəliyi, Polşa Respublikasının Velikopolsk inzibati ərazisində Nyukasl xəstəliyi, Kamboca Krallığının Otdar Mean Çey əyalətində, Amerika Birləşmiş Ştatlarının Ayova, Viskonsin ştatlarında, Slovakiya Respublikasının Jilina diyarında isə yüksək patogen quş qripi xəstəliyi qeydə alınıb. Respublika ərazisinin bu yoluxucu xəstəliklərdən qorunması üçün qeyd olunan ərazilərdən zonalaşma prinsipi nəzərə alınmaqla, müvafiq malların idxalına ÜHST-nin “Quruda yaşayan heyvanların sağlamlıq Məcəlləsi”nə uyğun olaraq Qida Təhlükəsizliyi Agentliyi tərəfindən müvəqqəti məhdudiyyət tətbiq olunub. Eyni zamanda müvafiq tədbirlərin görülməsi üçün Dövlət Gömrük Komitəsinə müraciət olunub.

Hava dəyişdikcə bədənimiz əlavə dəstəyə ehtiyac duyur.  Düzgün qidalanmaqla immun sisteminizi təbii yollarla gücləndirə bilərsiniz! Bəs nələri rasiona əlavə etməliyik?  - Giləmeyvələr bədəni gümrah saxlayır. - Balıq immuniteti artırır, infeksiyalara qarşı müdafiəni gücləndirir. - Tünd yaşıl yarpaqlı tərəvəzlər hüceyrələri qoruyur. - Çərəzlər immuniteti balanslaşdırır. - Ədviyyatlar iltihabı azaldır. - Sitrus meyvələri C vitamini mənbəyidir. - Rəngli tərəvəzlər immuniteti gücləndirir. - Toyuq şorbası və sümük bulyonu iltihabı azaldır, bağırsaq divarını bərpa edir. - Probiotik qidalar bağırsaq mikroflorasını dəstəkləyir. Sağlam qalın, immunitetinizi təbii yollarla gücləndirin!

Qida Təhlükəsizliyi Agentliyinin sədri Qoşqar Təhməzli oktyabrın 30-u saat 14:00-da Agentliyin inzibati binasında qida sahəsində fəaliyyət göstərən sahibkarları qəbul edəcək. Qida zəncirinin bütün mərhələlərində fəaliyyət göstərən sahibkarlar, o cümlədən qida məhsullarının istehsalı, emalı, idxal-ixracı, daşınması, satışı və sair sahələrdə çalışan şəxslər onları narahat edən məsələlərlə bağlı Agentlik sədri ilə görüşə bilərlər. Görüşdə iştirak etmək istəyən şəxslər ad, soyad, fəaliyyət sahəsi, müraciətin məzmunu və telefon nömrələrini göstərərək info@afsa.gov.az elektron poçtu vasitəsilə müraciət etməklə və ya (+994 99) 786 77 86 nömrəsinə zəng etməklə, həmçinin vatsap üzərindən əlaqə saxlamaqla oktyabrın 29-dək qəbula yazıla bilərlər.

Qida Təhlükəsizliyi Agentliyinin əməkdaşlarına “Təlimçilər üçün təlim” mövzusunda təlim keçirilib. Dövlət İmtahan Mərkəzi tərəfindən təşkil olunan təlimdə iştirakçılara təlim funksiyasının strateji rolu, peşəkar təlimçinin keyfiyyətləri, təlim metodları, təqdimat bacarıqları, təqdimat zamanı bədən dili və auditoriya ilə işin xüsusiyyətləri barədə ətraflı məlumat verilib. Sonda iştirakçıların sualları cavablandırılıb.

Bakı şəhəri, Sabunçu rayonu, Ə.Məmmədəliyev küçəsində yerləşən, fiziki şəxs Baxşəliyev Rüfət İlqar oğluna məxsus “Mədinə” mərasim evində Qida Təhlükəsizliyi Agentliyinin əməkdaşları tərəfindən keçirilən yoxlama zamanı texniki normativ hüquqi aktların, sanitariya norma və qaydalarının tələblərinin pozulduğu məlum olub. Belə ki, mərasim evinin qida təhlükəsizliyi qeydiyyatından keçmədən fəaliyyət göstərdiyi, emal sahəsində havalandırma sisteminin quraşdırılmadığı, mətbəxdə masaların bir qisminin asan yuyulub təmizlənən materialdan hazırlanmadığı, soyuducuda rəflərin korroziyaya məruz qaldığı, işçi heyətin ilkin və dövri tibbi müayinədən keçmədiyi və gigiyenik təlimlərə cəlb edilmədiyi, müvafiq təmizlik işlərinin görülmədiyi və digər nöqsanlar müəyyən edilib. Həmçinin mənşəyi məlum olmayan pendir məhsulu aşkarlanıb. Pendir məhsulundan nümunələr götürülərək laborotor müayinələrə cəlb edilib. Faktla bağlı mərasim evində nöqsanlar aradan qaldırılanadək işlərin görülməsi, xidmətlərin göstərilməsi dayandırılıb, rəhbərliyi barəsində inzibati protokol tərtib olunub.

Qida Təhlükəsizliyi Agentliyinin regional bölməsi tərəfindən KTN-nin Aqrar Xidmətlər Agentliyi, DİN-in Masallı Rayon Polis Şöbəsi və yerli  icra nümayəndəliyinin əməkdaşları ilə birgə Masallı rayonunun Kosakül kəndində fəaliyyət göstərən heyvan bazarında monitorinq keçirilib. Bazar ərazisinə gətirilən nəqliyyat vasitələri dezinfeksiya edilib. İri və xırdabuynuzlu heyvanlara baxış keçirilib. Qeydə alınmış nöqsanların aradan qaldırılması barədə müvafiq göstərişlər verilib.

Azərbaycan Qida Təhlükəsizliyi Agentliyinin (AQTA), Daxili İşlər Nazirliyinin, Kənd Təsərrüfatı Nazirliyinin Aqrar Xidmətlər Agentliyinin və Bərdə Rayon İcra Hakimiyyətinin əməkdaşları tərəfindən Bərdə rayonunun Alpoud kəndində yerləşən heyvan bazarında monitorinq aparılıb. Monitorinq zamanı heyvanların saxlanma şəraiti, ticarət prosesi, baytarlıq nəzarətinin təşkili, eləcə də dezinfeksiya, dezinseksiya və deratizasiya tədbirlərinin icra vəziyyəti qiymətləndirilib.  Baxış zamanı heyvan sağlamlığına dair bir sıra tələblərin pozulduğu aşkarlanıb. Yerində aparılan yoxlamalar nəticəsində heyvan sağlamlığının qorunması və yoluxucu xəstəliklərin qarşısının alınması məqsədilə sahibkarlara müvafiq tövsiyələr verilib. AQTA bildirir ki, epizootik sabitliyin qorunması, zoonoz və xüsusi təhlükəli xəstəliklərin yayılmasının qarşısının alınması məqsədilə ölkə ərazisində fəaliyyət göstərən heyvan bazarlarında 2025-ci il 25 oktyabr tarixindən etibarən mərhələli şəkildə müvəqqəti məhdudiyyətlər tətbiq olunacaq. Bu müddət ərzində bazar ərazilərində sağlamlaşdırma tədbirləri həyata keçiriləcək. Qeyd edək ki, heyvan bazarlarında tələb olunan infrastruktur təmin edildikdən və baytarlıq-sanitariya tələblərinə uyğun şərait yaradıldıqdan sonra onların fəaliyyəti bərpa ediləcək.